Лаура Ковеши повеќе не е на чело на Специјалното јавно обвинителство (ДНА), тело кое успешно се бореше против распространетата корупција во Романија. Министерот за правда Тудорел Тоадер упорно сакаше да ја тргне Ковеши д оваа функција и по повеќе месеци, овој потфат му успеа.
Денес, по барање на Владата на Романија и по одлуката на Уставниот суд, претседателот Клаус Иоханис мораше, против својата лична волја, да го потпише указот за разрешување на Ковеши.
– Борбата против корупцијата не смее, во ниту еден случај, да биде напуштена или да сопре, изјави портпаролката на Јоханис.
На ова Ковеши на денешната прес-конференцијата рече дека во моментов нема политичка волја за независно правосудство и им порача на граѓаните дека корупцијата може да биде поразена. Според неа, зад иницијативата на Владата и Тоадер не стои желба за ефикасно судство туку желба да се сопрат истрагите и правдата:
-Корупцијата може да биде поразена, не се откажувајте, изјави таа на прес-конференцијата.
На инцијатива на министерот за правда беше покрената процедура за разрешување на Ковеши, жената чија што одлучна борба против корупцијата, на Романија и донесе многу пофалби во Европа и во светот. Според Тоадер, Ковеши со своите антикорупциски акции, го нарушила имиџот на Романија во светот.
Ковеши го подобри меѓународниот имиџ на Романија
Но случуваше токму спротивното. Ковеши го подобри имиџот на Романија која важеше да најкорумпирана земја во ЕУ откао влезе во европскиот клуб. Токму таа репутација ја натера Европската комисија да воведе, за Романија и Бугарија, посебен механизам на мониторинг во оваа област па така Комисијата секоја година објавува извештај за напредокот во борбата против корупцијата во Романија.
Овие годишни извештаи на бриселската администрација беа многу подобрени во последните години. Ковеши стана страв и трепет за корумпирани политичари и на извесен начин пример за тоа како треба да се води борбата против корупцијата.
Во годишниот извештај што таа го презентираше во февруари годинава, Ковеши кажа дека во 2017 година пред Суд биле изведени 1.000 функционери под обвинение за корупција. Помеѓу нив има тројца министри, шест пратеници и поранешен претседател на Парламентот. Исто така, таа наведе дека директоратот кривично гонел 713 функционери, вклучувајќи и 28 градоначалници, 38 директори на јавни институции и еден сенатор.
-Сепак, корупцијата во Романија е и понатаму голема, на пример некои директори на болници земале милиони евра мито, а злоупотребите на ЕУ фондовите биле двојно зголемени, рече Ковеши.
Реакциите на ЕУ и САД
Токму затоа денес реагираше и Европската комисија заедно со САД. Тие потенцираа дека државата треба да продолжи да се бори против корупцијата.
Европската комисија ја предупреди денеска Романија дека ако резултатите од борбата со корупција во државата се влошат по отстранувањето од раководната позиција во Националната дирекција за борба со корупцијата Лаура Кодруца Ковеши, тоа ќе биде земено предвид.
–Во неколку наврати забележавме колку е важно судскиот систем во Романија да биде независен, за да има моќ да се бори против корупцијата – рече денес портпаролот на Комисијата.
Владата ја обвини Ковеши дека води политички процеси
Но оваа борба очигледно не и се допадна на социјал-демократската власт во Букурешт. Новото раководство на Социјалдемократската партија со месеци се обидува да ја разреши Ковеши која осуди и неколку видни членови на оваа партија, вклучувајќи го и поранешниот партиски лидер за изборни нерегуларности. Владеачката партија ја обвинува дека како шеф на Специјалното јавно обвинителство (ДНА), води случаи кои биле политички мотивирани.
По оваа иницијатива на министерот за правда за разрешување на Ковеши, илјадници граѓани протестираа во градови во цела Романија барајќи оставка од министерот за правда поради неговото барање да се смени главната обвинителка за корупција. Онлајн петицијата во која се претседателот Јоханис се повикува да не ја смени ја потпишале 108.000 граѓани.
Претседателот Јоханис изјави тогаш дека нема да ја смени шефицата на антикорупциското тело, како што побара Владата, но по одлуката на Уставниот суд мораше да го потпише указот бидејќи спротивното би било кршење на Уставот.
Специјалното јавно обвинителство беше формирано во 2006 година како еден од условите од Брисел за влез на Романија во Европската Унија.
Во февруари 2017 година НОВА беше во посета на ова обвинителство во Романија и направи интервју со Ковеши.