Денешниот ден е посветен на сесловенските просветители „Св. Кирил и Методиј“. За нивниот живот и дела се напишани над 10.000 студии, прилози и статии, а многу цркви и образовни институции го носат нивното име. Тие се патрони на Скопскиот универзитет. Во 11 век, Црквата го прогласила 24 мај (11 мај по стариот календар) за ден на светите просветители Кирил и Методиј. Денот во Македонија за првпат бил одбележан на 11 мај во 1860 година во црквата „Св. Богородица“ во Скопје.
Чествувањето со различни манифестации продолжува до денес. Централната е со поклонение на гробот на св. Кирил во базиликата „Св. Климент“ во Рим што за првпат е организирано во 1969 година за 1100 години од смртта на свети Кирил и оттогаш секоја година на 24 мај се одбележува со највисоки почести од црковно-државна делегација.
Но, годинава поради актуелната состојба со коронавирусот изостана вообичаено чествување на празникот и откажано е поклонението на државно-црковната делегација на неговиот гроб во Рим. Во последните години одбележувањето беше заедничко со Бугарија, но овојпат македонскиот претседател Стево Пендаровски и бугарскиот Румен Радев решија да ја откажат посетата на Рим и Ватикан, а чествувањето да го одложат за втората половина од годинава кога условите ќе го овозможат.
Традиционално, 24 мај беше ден само на образовните институции и на просветните работници, а од 2007 година тој е државен празник во нашата земја и неработен ден за сите граѓани.