Актерот Бил Козби и режисерот Роман Полански се исклучени  од американската Академија за филмска уметност и наука, соопшти престижната организација која ги доделува Оскарите .

Во соопштението од американската Академија за филм пишува дека членовите на одборот “гласале да се исклучат актерот Бил Козби и режисерот Роман Полански  во согласност со стандардите на однесување на организацијата. Одборот продолжува да промовира етички стандарди и бараат од членовите да ги поддржат вредностите на Академијата за почитување на човековото достоинство”.

Само четворица луѓе досега  биле протерани во 91-годишната историја на Академијата.

Американскиот комичар Бил Козби е прогласен за виновен за три сексуални напади. Актерот беше обвинет дека ја дрогирал и сексуално ја вознемирувал поранешната кошаркарка Андреа Констанд во 2004 година.

Роман Полански е обвинет дека  дрогирал и силувал 13-годишно девојче во куќата на Џек Николсон во 1977 година. Полански признал дека имал сексуални односи со девојчето и поминал 42 дена во притвор пред да биде пуштен со кауција. Тој побегна во Франција во 1987 година и веќе никогаш не се врати во САД.

Полански во 2003 го освои Оскарот за најдобар режисер за филмот „Пијанист“.

Во октомври минатата година, одборот на Академијата за филм го исклучи од членство во организацијата продуцентот Харви Вајнстин откако 70 жени поднесоа тужби против него за сексуално злоставување.