На првата официјална средба, министрите за надворешни работи на Македонија и на Грција, Никола Димитров и Никос Коѕиас Атина изразија задоволство и надеж за унапредување на односите и ги повторија ставовите дека Македонија очекува поддршка од Грција, додека Грција сака прво компромис за името, па потоа евро-атлантска интеграција на Македонија.
– Грција цврсто го поддржува територијалниот интегритет на државата, без интервенции од трети страни. Ние сме против санкции кон нашиот сосед. Знаеме дека нашиот сосед сака да биде член на разни организации, ние сме подготвени, но прво мора да се реши прашањето за името. Претходната влада не работеше на компромис и прашањето за името од географско го претвори во идентитетско. Се надевам дека ќе разговараме за името што ќе доведе до решение. Ви благодарам Никола што за вашата прва официјална посета го одбравте овој град, рече Коѕиас денеска на заедничката прес конференција со Димитров во Атина.
Димитров рече дека на средбата ги кажал приоритетите на новата влада
-Сакам преку конкретни чекори да изградиме нова слика во регионот. Ние ќе си го изиграме нашето и ќе продолжам да давам аргументи и со зборови и со дела дека е во интерес на нашиот поголем и повлијателен сосед ние да бидеме европска демократија која ќе влезе во НАТО и ќе почне преговори за ЕУ. Уверен сум дека отворањето на патот може да помогне да се затвори главното прашање. Не сум наивен, ова е прва средба, патот нема да биде лесен, но сакам да ја пренесам пораката дека овде сум да барам поддршка, нас ни треба поттик за исправено да зачекориме по патот по кој сакаме да одиме. Бевме неподвижни неколку години. Немаме скриени агенди и сакаме да бидеме пријател со вашата земја, порача Димитров.
На прашањето во врска со „иредентизмот“ за кој се зборува во Грција, македонскиот министер рече дека тој не е од оние кои придаваат значење на скулптурите и имињата. Тоа, според Димитров, им наштети на нашите односи и им даде оаргументи на оние кои не сакаа да има добри односи меѓу Македонија и Грција.
– Да ве убедам дека ние сме фокусирани цврсто на границите кои ги имаме, сакаме да си ја спасиме државата, предолго чекаме, рече тој.
Коѕиас, пак, демантираше дека кризата во Македонија се појавила како последица на одлуката во Букурешт во 2008 и додаде дека претходната македонска влада воопшто не практикувала постигнување компромис.
– Задоволни сме што соседната земја го најде патот за стабилноста, навистина сме задоволни со се што чувме за заложбите на новата влада и премиерот Зоран Заев. Преговорите стануваат попријатни. Се согласивме со министерот дека треба да се преземат најдобрите мерки и чекори за развој на нашата соработка и да почне процес на градење мерки на доверба. Го расчистивме и прашањето за патот за пренос на нафта од солунското пристаниште, за развој на железницата, дипломатските односи, сега зборувавме за изградба на гасоводот од Грција до Скопје, имаме стабилни односи меѓу универзитетите, напредуваме во мерките за градење на доверба и се предлагаат нови мерки, рече Коѕиас.
На средбата двајцата министри зборувале за мерките за градење доверба, па на досегашниот список се додадени уште неколку.