Емерсон Мнангагва положи свечена заклетва како претседател на Зимбабве на церемонија на преполниот стадион во главниот град Хараре.
Ова следи по драматичното заминување од функцијата на Роберт Мугабе, по 37 години авторитарно владеење.
Тој рече дека се чувствува почестен за да ја преземе улогата и вети дека ќе работи на консолидирање на земјата по политичката и расната поделба, „во интерес на сите кои помогнаа да се се случи овој ден”.
-Од мене се бара да и служам на нашата земја како претседател на сите граѓани, „без оглед на расната припадност, верата, религијата, племето, тотемите или политичка припадност”.
Тој му оддаде почит на својот претходник Роберт Мугабе нарекувајќи го “татко, ментор, другар и мој лидер”, што наиде на молк кај присутните на стадионот.
-Негова заслуга е што ја обнови нашата земја, рече тој.
Поранешниот заменик на Мугабе беше разршен од функцијата, наводно поради судирот со сопругата на Мугабе, Грејс, која имаше амбиции да го наследи сопругот на претседателската функција.
Тој ја напушти земјата на почетокот на месецов, кога војската ја презеде власта и го стави Мугабе и неговата сопруга во домашен притвор.
Опозицијата го повика Мнангагва, кој е дел од владејачката елита, да стави крај на “коруптивното владеење“.
Мнангагва се поврзува со некои од најголемите злосторства извршени од владејачката партија Зану-ПФ, од независноста на земјата во 1980 година.
Тој се смета за клучен играч во граѓанската војна во 80-тите, во која беа убиени илјадници цивили. Но, тој негираше каква било улога во масакрите, обвинувајќи ја армијата за тоа.