ЕУ и Швајцарија денес потпишуваат договор кој го доби атрибутот “историски” и кој треба да ја подобри борбата против даночното затајување.
Во рамките на договорот двете страни се обврзуваат да споделуваат автоматски информации за финансиските сметки на нивните граѓани од 2018 година.
Овој договор го означува крајот на банкарската тајност на Швајцарија за граѓаните на ЕУ па така оние кои имаат намера да затајат данок нема повеќе да можат своите нечесно заработени пари да ги стават на сметка во оваа земја.
Комесарот за економија Пјер Московици рече дека со овој потпис се отвара нова ера која ќе биде далеку потранспарентна и им се задава сериозен удар на оние кои сакаат да не ги пријават своите приходи и да ја стават ваквата заработка вон од својата земја. Московици се надева дека и други земји ќе ги следат примерот на ЕУ и нејзините членки доколку се определени за вистинска борба против даночното затајување.
Автоматската размена на информации е еден од најефикасните инструменти за борба против даночно затајување бидејќи на даночните власти им дава клучни информации за непријавениот приход на сметките на граѓаните па овие власти можат лесно да го пресметаат данокот кој и се должи на државата.
Во рамките на договорот ЕУ-Швајцарија, земјите членки ќе добиваат секоја година имиња, адреси, броеви на даночна идентификација и датумите на раѓање на сите кои имаат сметки во Швајцарија како и тоа колку пари има на на сметката. Оваа мерка и има и разубедувачки ефект кај оние кои се сакаат да скријат данок.
Договорот е компатибилен со новата светска норма на ОЦДЕ и Г20 која се однесува на автоматска размена на информации.
Европската комисија преговара ваков договор и со Андора, Лихтенштајн, Монако и Сан Марион. Овие договори треба да се потпишат до крајот на годината.