Полицијата поднесе кривична пријава до Основното јавно обвинителство за гонење на организиран криминал и корупција против директорот на МРТ, Марјан Цветковски. Во пријавата од Единицата за економски и компјутерски криминал, Цветковски се сомничи дека го оштетил буџетот на МРТ за повеќе од милион денари, пари кои отишле на сметка на „Аналитико“.
Во пријавата пишува дека Цветковски, при спроведување на отворена постапка во хартиена форма што завршува со „е-аукција“ за јавна набавка – “Електронско мерење на ТВ аудиториум со пиплметри на територијата на РМ“ за потребите на ЈП МРТ Скопје, склучил договор со правното лице “Аналитика“ ДООЕЛ – Скопје. Иако, Цветковски знаел дека во – “Извештајот од спроведената постапка“ изготвен од Комисијата за јавни набавки при ЈП МРТ Скопје , економскиот оператор “Аналитика“ понудил нова намалена единечна месечна цена од 87.637,50 денари во однос на почетната единечна месечна цена од 175.000 денари и бил даден предлог, постигнатата нова цена да биде избрана како најповолна понуда, сепак тој по претходен договор со одговорни лица од Аналитика, донел Одлука за избор на најповолна понуда со која за најповолен понудувач ја избрал оваа фирма.
Договорот бил склучен на 13.07.2016 година. Со ова, според МВР, Цветковски ја злоупотребил својата службена положба со намера на “Аналитика“ ДООЕЛ да и овозможи противправна имотна корист.
Пријава е поднесена и против лицето кое ја застапувало „Аналитика“ Г.С.
Договорот бил склучен на вкупна вредност од 2.100.000 денари без пресметан ДДВ,иако знаеле дека согласно последната постигната аукциска цена спогодбата требало да биде склучена на износ од 1.051.650 денари без пресметан ДДВ за 12 месеци. Со ова , МВР смета дека двајцата го оштетиле буџетот на ЈП МРТ за повеке од еден милион денари, а истовремено за толкав износ прибавиле противправна имотна корист за правното лице .
Марјан Цветковски од неодамна по трет пат беше избран за директор на МТВ. Цветковски ниту еднаш за време на своето долгодишно директорување не поднесе анкетен лист за имотната состојба до Државната антикорупциска комисија.