До петок, судија за извршување санкции во Кривичниот суд има рок да одговори на жалбата што ја поднесоа адвокатите на екс премието Никола Груевски за одложување на двегодишната затворска казна за случајот „Тенк“. Претседателот на Кривичниот суд Иван Џолев на брифинг со новинарите кажа дека до Судот денеска пристигнала жалбата од адвокатите која била испратена преку пошта во понеделникот.
Доколку жалбата биде одбиена, Груевски има нов рок од три дена да поднесе жалба до Кривичниот совет кој одлучува исто така во рок од три дена. Целата оваа постапка во максимални рокови би требало да заврши за 9 дена, односно до 8 ноември, кога е крајниот рок до кога Груевски треба да се пријави на издржување на казната затвор во Шутка.
Џолев не сакаше да ги коментира причините кои ги навеле адвокатите на Груевски за одложување на пресудата.
Во Законот за извршување санкции пишува дека одложување на казната затвор може да се бара по неколку основи: Ако осудениот се наоѓа на болничко лекување од потешка акутна болест, се случила смрт или тешка болест во потесното семејство на осуденото лице, одлагањето е потребно заради извршување или довршување на неодложни полски или сезонски работи, осуденото лице е обврзано да изврши одредена работа што веќе ја започнало, а поради неизвршувањето на таа работа би настапила позначителна штета најдолго за три месеца, одлагањето на осуденото лице му е потребно заради завршување на училишната година или за полагање на испит за кој се подготвувало најдоцна до завршување на училишната година и шест месеци за испит; заедно со осуденото лице се осудени неговиот брачен другар или други членови на заедничкото домаќинство, осуденото лице е потребно одредено време да се грижи за воспитување и чување на децата или згрижување на немоќни лица за кои е должно да се грижи.
Неофицијално, причините поради кои Груевски бара да не оди в затвор се обврските кои ги има како пратеник поради процесите во Собранието поврзани со уставните измени, како и докторатот кој го бранеше летоска, односно врз основа на тоа дека пишува книга.
Барањето на адвокатите на Груевски за вонреден правен лек за преиспитување на пресудата за „Тенк“и Врховниот Суд да дозволи одложување на затворската казна, се додека не одлучи по вонредниот правен лек, се уште не е испратено до Врховниот суд. Како што обајсни претседателот на Основниот суд Џолев целата документација за предметот „Тенк“ е во Судот, затоа што течат рокови за редовен правен лек на Јанкуловска.
„Во предметот имаше издвоена постапка за Гордана Јанкуловска и беа користени истите докази. И сега течат роковите за редовен правен лек на Јанкуловска до Апелација. Ако во меѓувреме Јанкулоска поднесе жалба до Апелацискиот суд Скопје, ние како суд веднаш ќе направиме фотокопии од предметот за Врховниот суд за да може да постапува, а оригиналите ќе бидат испратени во Апелација, бидејќи редовните правни лекови имаат предност пред вонредните“, рече претседателот на Основниот суд Скопје 1 Иван Џолев, на брифингот со новинарите.
Рокот на Јанкуловска да поднесе жалба на пресудата на Основниот суд за Тенк истекува на 6 ноември.
Претседателот на Судот, исто така напомена дека согласно Членот 466 од Законот за кривична постапка надлежност за одлучување по барањето за одложување на затворската казна имаат два суда – Првостепениот суд или Судот надлежен да одлучува по барањето да се одложи затворската казна, односно Врховниот суд.
Доколку Судот го одбие барањето за одложување на издржување на затворска казна и Груевски на 8 ноември замине в затвор, тој има можност да излезе од таму ако потоа Врховниот суд ја укине пресудата и одлучи предметот да се врати на повторено судење, а со тоа да се прекине и издржувањето на затворската казна.