Бугарскиот културен центар „Ванчо Михаилов“, пред малку објави писмо за кое велат дека го испратиле до сите странски амбасадори во Македонија. Во писмото тие поименично го обвинуваат државниот врв претседателот Пендаровски, премиерот Ковачевски и шефот на дипломатијата Османи дека се „најактивни во јавните обвинувања против клубот ‘Ванчо Михаилов’ и дека тоа што го опишувале Михајлов како „хитлерист“ довело до чинот на палењето на влезната врата на нивниот клуб во Битола.
„Како што веројатно знаете пред неколку дена во Битола беше извршен уште еден чин на насилство врз културниот центар на бугарската заедница во Битола. Центарот ‘Иван Михаилов’среде бел ден беше преплавен со бензин и запален. Овој нов чин на заплашување доаѓа по целата злобна кампања против бугарскиот народ во Северна Македонија. Во јавните обвинувања против клубот најактивно учествуваа претседателот Пендаровски, премиерот Ковачевски и министерот Османи, кои до вчера тврдеа дека Ванчо Михаилов бил хитлерист, а по истата логика – и ние Македонските Бугари. Но еве – оваа лага доведе до уште еден чин на национална омраза баш во стилот на Кристалната ноќ во ноември 1938 година. Кој е сега фашист? И зошто никој од Вас – нашите европски партнери не реагира на овој срамен чин“, пишува претседателот на здружението Ванчо Михајлов, Љубчо Георгиевски.
Во писмото понатаму се обвинува и дека „тоа е директен и докажан резултат на државно субвенционираната кампања на омраза против нашиот бугарски народ во Северна Македонија. Ова е резултат на замената на нашиот бугарски национален идентитет од југословенската окупација во 1944 година до денес. Подметнувачите на пожари се од круговите кои со децении пишуваат глупости во учебниците, кои ги конфронтират нашите деца со сопствениот бугарски народ“.
„Доколку Вие, на кои се надевавме дека ќе помогнете за започнување на демократизацијата на скопскиот режим, не го прифатевте премолчено фалсификувањето на пописот, денес немаше да бидеме сведоци на ова беззаконие. Оти да бевме само 3.500, очигледно немаше да се плашат од нас и да не запалат. Денеска се прашуваме дали ќе молчевте ако беше запалена албанска џамија? Пошто ние би реагирале на секое повредување на демократските права на која било група на наши граѓани“, се наведува во писмото.
„Ние од клубот ‘Иван Михаилов’ не сме бугарски државјани. Ние сме меѓу стотиците илјади кои се сеќаваат на нивното вистинско потекло и историја. Ќе останеме верни на аманетот на Гоце Делчев, Тодор Александров и Иван Михаилов. И нема да се плашиме од пироманите што ги праќаат против нас. Ве молиме, господине амбасадоре, како претставник на земја од европското семејство, во кое сакаме да се приклучи нашата татковина, да го заштитите нашиот бугарски народ во Северна Македонија од омразата што ја диктира владата и насилството што таа го роди“, се вели во писмото потпишано од претседателот Љубчо Георгиевски. (Р.Н.)