Денеска, верниците од муслиманска вероисповед го слават Курбан Бајрам, еден од најголемите муслимански празници, кој ги обединува верниците во духот на солидарноста, хуманоста и меѓусебната почит. Празникот, кој симболизира жртва, вера и помагање на ближниот, традиционално се одбележува со молитви, семејни собири и дарување на оние на кои помошта им е најпотребна. Во домовите се чувствува празнична атмосфера, а пораките за мир, здравје и заедништво остануваат во фокусот на чествувањето.
По повод Курбан Бајрам, честитка до верниците од исламска вероисповед упати поглаварот на ИВЗ, Реис ул Улема, Шаќир Фетаи. На овој голем ден, како што посочува, верниците со задоволство ја извршуваат божествената обврска на принесување курбан, сведочејќи во практика дека богатството е дар од Бога и дека тоа не е цел на животот, туку средство за постигнување на неговите цели: верата, грижата за себе, за човекот, за сиракот, за сиромавиот, за знаењето и за човечката благосостојба.
– Ова го потврдува големиот исламски принцип дека нема големи дела без големи жртви и дека доброто се постигнува со жртвување дури и на најмилото што човекот го поседува. Затоа, празникот Курбан бајрам, преку курбанот, гради конструктивна, умерена и мудра личност, посветена на доброто, солидарна, мирољубива и во секој момент внимателна за општото добро – нагласи Фетаи.
Тој, во честитката, вели дека овој празник го прави верникот свесен да ги оттурне од себе омразата, љубомората, агресивноста, потценувањето, дискриминацијата и поделбите.
– Тој симболизира висока свест за Создателот, грижа за здравото семејство, блискост меѓу луѓето, мудрост во постапките, љубов кон блиските, родителите и семејството, зацврстување на меѓучовечките врски, избегнување конфликти меѓу државите и народите, како и ширење мир, толеранција и солидарност за издигнување на поединецот, семејството и општеството во целина. По повод овој голем празник, ја користам оваа пригода, во име на Исламската верска заедница на РСМ и во мое лично име, да упатам најискрени и најсрдечни честитки до сите верници, до нашите семејства, како и до нашите сонародници каде и да живеат. Честит Курбан Бајрам! – истакнува Фетаи во честитката.
Во својата порака, тој го истакна духовното значење на овој празник, кој е поврзан со извршувањето на хаџот и колењето на жртвени животни, опишувајќи го како период на размислување за верата, жртвувањето и посветеноста на Бога.
Фетаху истакна дека Курбан Бајрам промовира вредности како што се солидарност, мир, почит и грижа за сиромашните и семејството, повикувајќи на зајакнување на меѓучовечките врски и избегнување на поделби. Тој посака жртвите и молитвите на верниците да бидат прифатени и тие да го поминат празникот со благосостојба, здравје и хармонија.
Овој празник е познат како празник на жртвата, бидејќи тогаш се принесува животно како жртва за доброто на верата и за корист на луѓето, традиција која останала до ден-денешен. Обичајот го изведуваат сите муслимани кои имаат можност за тоа, веднаш по клањањето на бајрамскиот намаз. Покрај овен, за курбан може да се принесе и овца, коза, крава или камила.
Потоа, месото се дели на три дела, еден дел се задржува за семејството, додека другите два им се делат на сиромашните, на соседите и на роднините, а може да се подели и целиот курбан.
Хуманизмот, хармоничните односи меѓу луѓето, меѓу човекот и светот, и стремежот кон мир и благосостојба, како основни принципи на исламот на празникот Курбан бајрам, се исполнуваат со посетување на роднините и пријателите и со честитки и добри желби за секој намерник.
Курбан бајрам се одбележува 70 дена по првиот Бајрам во годината, Фитр-бајрам или Рамазан, а со него се поврзува комплетирањето на светиот Куран. Курбан Бајрам го одбележува и завршувањето на аџилакот на аџиите кои одат да се поклонат на светата Ќаба во Мека. Аџилакот е една од петте свети должности на муслиманите.