Сириските демократски сили ќе го прифатат договорот за примирје со Турција и ќе направат се што е неопходно тој да биде спроведен, изјави командантот на силите предводени од Курдите, Мазлум Кобани.
Кобани рече дека договорот е само почеток и оти со него нема да се постигнат целите на Турција.
Тој додаде дека договорот е ограничен на дел од сириската граница со Турција меѓу градовите Рас ал-Аин (на курдски Кобани) и Тал Абџад.
По состанокот на делегациите на САД и Турција во Анкара, на кој е договорено турската операција „Извор на мирот” на северот на Сирија ќе биде запрена на 120 часа, шефот на турската дипломатија Мевлут Чавушоглу изјави дека „Турција ќе ја заврши операцијата на северот на Сирија, откако терористите на ЈПГ/ПКК ќе го напуштат тоа подрачје“, јави агенцијата Анадолија.
-Привременото запирање на операцијата не значи повлекување на нашите војници и нашите сили. Ќе бидеме таму и понатаму, ќе продолжиме да делуваме, рече Чавушоглу, додавајќи дека привременото запирање на операцијата не е примирје, затоа што како што рече, примирје може да се прави само помеѓу две легитимни страни.
– Согласни сме во врска со собирањето на тешкото оружје на ЈПГ (Единици за народна заштита н.з.), уништување на нивните позиции и тврдини, изјави Чавушоглу пред новинарите.
Тој нагласи дека Турција никогаш нема да влегува во било какви преговори со терористите.
Но и покрај тоа, експлозии на гранати и пукање и денеска се слушаат во областа Рас ел Аин, на североистокот од Сирија.
Британските медиуми јавуваат дека во градот Селјанпајнар одекнувале експлозии од гранати и се слушало пукање од автоматско оружје
Турскиот претседател Реџеп Таип Ердоган во Анкара вчера го прими потпретседателот на Соединетите Американски Држави (САД), Мајк Пенс, а на состанокот присуствуваше и специјалниот претставник на САД за Сирија, Џемјс Џефри, по што е одржана и средба на делегациите на двете земји.
Пенс и државниот секретар на САД, Мајк Помпео вчера допатуваа во официјална посета на Република Турција.
Генералниот секретар на ОН Антонио Гутереш го поздрави како што рече, секој напор со цел деескалација на ситуацијата во североисточна Сирија и заштита на цивилите, изјави портпаролот на ОН Стефан Дижарик.
Во соопштението се додава дека Гутереш сфаѓќа оти патот до ефикасно решение за кризата во Сирија сè уште е долг.
Турција на 9 октомври ја почна операцијата „Извор на мирот“, само два дена откако американскиот претседател Доналд Трамп ја соопшти одлуката за повлекување на американските војници од североистокот на Сирија. Цел на оперцијата, според официјална Анкара, е создавање „тампон зона“ за заштита на турската граница во која може да се вратат сириските бегалци од камповите во Турција.
Воената операција наиде на реакции во светот, при што се бара Турција итно да ги запре воените дејства.





