Данска ја декласира Полска во дербито на вечерта, Германија ја продолжи импресивната победничка серија, Црна Гора останува во мундијалски сон. Ова се моментите што ја одбележаа денешната фудбалска понуда во во квалификациите за Светското првенство во Русија во 2018 година.
https://www.youtube.com/watch?v=z6mepKPDlRA
Полјаците отпатуваа во Копенхаген по резултат за „бетонирање“ на лидерската позиција во групата Е. Но, наместо освојување на бод или три, Левандовски и компанија доживеаја дебакл на „Паркен“ стадионот. Данците славеа триумф со 4:0 што можеше да биде изразен и со поубедлива разлика. Во првото полувреме погодија Дилејни и Корнелиус, кон нив се надоврзаа Јоргенсен и Ериксен во второто за испраќање на Полјаците кон Варшава со полна мрежа и голем товар пред трите последни меча од групната фаза.
https://www.youtube.com/watch?v=8zULvyoyotQ
Полска останува лидер на табелата со 16 бода, но Црна Гора и Данска сега имаат по 13 на второто, односно, третото место на табелата. Епилогот од Копенхаген оди во прилог и на Црногорците кои претходно во Астана го поразија Казахстан со 3:0. Стрелци за „џетичи“ на „Астана арена“ беа Весовиќ во првиот дел и Бечирај и Симиќ во продолжение на средбата.
Седма победа на Германија во седмиот меч
Германија останува единствена репрезентација со максимален ефект во циклусот. „Панцерите“ вечерва во Прага ја совладаа Чешка со 2:1. Матс Хумелс беше стрелец на победничкиот погодок за гостите во 88 минута. Тимот на Јоаким Лев поведе уште во четвртата минута преку Вернер, израмни Дарида во 78 минута.
https://www.youtube.com/watch?v=9u9_aOzxTb8
Северна Ирска долго време го пробиваше Сан Марино, а по првиот погодок во 71 минута постигна уште два до 78 минута за конечни 3:0 на гостувањето кај аутсајдерот во групата Ц во која и Норвешка славеше на домашен терен против Азербејџан.
Пораз на Словенија на Среќко Катанец во Братислава
Словенија загуби од Словачка, во Братислава, со 1:0 меѓутоа останува конкурентна за втората позиција во групата Ф. Немец го постигна единствениот гол на „Сити арена“ во Трнава и ги смести Словаците зад водечката Англија на табелата со 15 бода. Селекцијата на поранешниот македонски селектор има 11 на четвртото место колку и третопласираната Шкотска чии фудбалери славеа над Литванија со 3:0.
https://www.youtube.com/watch?v=9Yg5iYKlpq0
Англичаните, пак, се оправдаа како фаворити на островот во Средоземјето. Гордиот Албион ја порази Малта со 4:0 и со 17 бода остана водечки во Ф конкуренцијата. Два гола постигна Хари Кејн, по еден дадоа Бертран и Велбек, сите четири во второто полувреме.
Квалификации за СП 2018 во Русија
Група Ц, 7 коло
Чешка – Германија 1:2
Сан Марино – Северна Ирска 0:3
Норвешка – Азербејџан 2:0
Табела: Германија 21, Северна Ирска 16, Чешка 9, Норвешка 7, Азербејџан 7, Сан Марино 0.
Идно коло (4 септември): Германија – Норвешка, Северна Ирска – Чешка, Азербејџан – Сан Марино.
Група Е, 7 коло
Данска – Полска 4:0
Романија – Ерменија 1:0
Казахстан – Црна Гора 0:3
Табела: Полска 16, Црна Гора 13, Данска 13, Романија 9, Ерменија 6, Казахстан 2.
Идно коло (4 септември): Полска – Казахстан, Црна Гора – Романија, Ерменија – Данска.
Група Ф, 7 коло
Малта – Англија 0:4
Литванија – Шкотска 0:3
Словачка – Словенија 1:0
Табела: Англија 17, Словачка 15, Шкотска 11, Словенија 11, Литванија 5, Малта 0.
Идно коло (4 септември): Англија – Словачка, Шкотска – Малта, Словенија – Литванија.