Петра Квитова (26) се враќа во ВТА турот по шестмесечна пауза. И тоа на голема врата. Кам-бекот на чешката тенисерка ќе биде на Ролан Гарос, а во првиот официјален меч, по нападот во нејзината куќа, ќе игра против Американката Џулија Босеруп.

„Многу луѓе не веруваа дека повторно ќе можам да играм тенис. Но, ја добив најголемата битка, успеав да ги надминам сите проблеми и среќна сум што се враќам. Сакам предизвици, а овој што е зад мене беше најголемиот досега. Жива сум, ги имам сите прсти и можам да играм на Ролан Гарос“, рече Петра Квитова која е поставена за 15 носителка во женскиот костур на гренслемот во Париз, но, сепак, призна дека сè уште нема доволно „моќ и сила“.

Двократната освојувачка на Вимблдон на 20 декември лани беше нападната во нејзиниот дом во Простејов. Од „средбата“ со провалникот излезе со исеченица по раката поради што мораше на операција. Зафатот траеше четири часа пришто хирурзите успеаја да ги поврзат повредените тетиви и нерви на левата рака со која игра тенисерката од Чешка.