Откако утрово на веб страницата миланскиот дневен весник Ла Верита објави видео прилог со аудио снимки од како што се најавува договарањето меѓу Бојан Јовановски и Орце Камчев каде наводно се слуша и гласот на специјалната јавна обвинителка Катица Јанева, подоцна е објавен аудио материјал во траење од 12 минути во кој има 8 разговори, за кои весникот вели дека се „комплетните снимки од разговорите во случајот Рекет“.
Во првиот, Камчев вели дека не сака да троши пари и години на судски случаи, а се слушаат и детали за тоа како се спакувани парите во торбата.
Во вториот аудио запис, Јовановски и Камчев разговараат за претстојната вечер, во кој Јовановски му вели на Камчев дека „вечерта гости ќе му бидат другар му со сопругата“, а Камчев тука споменува две имиња Бобо и Синиша.
Во третиот запис, се слуша како Јовановски врти некому на телефон, а откако од другата страна никој не му се јавува му објаснува на Камчев дека и испратил СМС порака на „Катица“ за да ја информира дека „завршиле“.
Потоа следуваат уште 5 снимки кои се дел објавени и во текстот од утрово, а се однесуваат на планирање и договарање.
Во една од снимките, весникот тврди дека е гласот на специјалната јавна обвинителка Катица Јанева, која преку телефон, како што вели новинарот, му потврдува на Камчев да не се секира дека се ќе биде во ред.
-Не се секирај за ништо се ќе биде ОК, вели женскиот глас за кој весникот тврди дека е на Јанева.
На објавените снимки се слуша како соговорниците се договараат, при што во еден разговор Камчев како што тврди весникот, го прашува Бојан Јовановски:
„Втора работа, не знам дали жената е со нас во играва, таа Лиле“, при што весникот тврди дека се работи за обвинителката Лиле Стефанова, која во тоа време го води предметот Империја.
Понатаму Камчев објаснува: „Еднаш, Чифлиганец кога ми се јави, ми бараше дуќан за нејзе за стоматолошки ординации, за глупости и тие работи… Јас од….в сите тие работи, зашто не ме интересираше…“
ЛаВерита вчера првпат објави материјали за „Рекет“ меѓу кои и видео снимка, на која се Бојан Јовановски и Зоран Милески Кичеец кои се осомничени во случајот за тргување со влијание и за перење пари, и Орце Камчев кој е сведокот во случајот. Аудио разговорот е меѓу Јовановски и Камчев, кој се однесува на случајот Империја, во кој меѓу осомничените е и Камчев, и во кој се споменува и името на специјалната јавна обвинителка Катица Јанева.
Адвокатот Звонко Давидовиќ за НОВА вели дека објавената снимка не може да ја попречи истрагата, но испраќа сигнал до Обвинителството дека случајот што побрзо треба да биде расчистен.
За Давидовиќ многу пострашно е што излегуваат во јавноста вакви материјали.
Снимката за „Рекет“ останува доказ: Што открива нејзиното објавување