Премиерот Димитар Ковачевски и специјалниот претставник на ЕУ Мирослав Лајчак на Економскиот форум Делфи во Грција се согласија дека војната во Украина предизвикува негативни последици за стабилноста на Европа и посебно за Западен Балкан. Соодветна реакција на овие последици е забрзувањето на процесот за интеграција на земјите од регионот и итни преговори со Северна Македонија како приоритет.
Во фокус на средбата беше актуелната кризна состојба во Европа предизвикана од руската воена агресија врз Украина која што Северна Македонија ја осуди како брутално кршење на меѓународното право и го дава својот придонес во организирање ефикасна помош за украинските бегалци и во зајакнување на источното крило на Алијансата како одговор на можни непредвидени ситуации.
Претседателот на Владата Димитар Ковачевски на средбата со Лајчак посочи дека во дијалогот Скопје-Софија има напредок за кој е неопходна поддршка од Брисел за да се дефинира преговарачката рамка и да се постави цел за колку што е можно побрзо одржување на Првата меѓувладина конференција на Северна Македонија со Европската комисија како почеток на процесот за затворање на поглавјата за членство во ЕУ.