Ламбе Алабаковски, од денеска е на слобода, откако Кривичниот совет на Основниот суд во Битола му одреди мерка на претпазливост со тоа што му го одзеде пасошот, потврди правниот застапник Дарко Стефановски, јавуваат битолските портали.
Алабаковски прво беше притворен, па пуштен во домашен притвор, а сега е на слобода.
Тој се сомничи за опожарување на вратата на Културниот центар „Иван Михајлов“ во Битола, а според полицијата веќе го признал делото.
Овој настан ја крена на нозе битолската и македонската јавноста, особено што отворањето на бугарскиот клуб во Битола беше протолкуван како провокација, пред сѐ заради именувањето по контроверзната личност Иван Михајлов.
Настанот се случи на 4 јуни, во раните утрински часови кога Алабаковски доаѓајќи на велосипед, со туба со бензин го запалил влезот на културниот центар по што изгоре влезната врата на објектот и натписот со името на клубот.
МВР го откри потпалувачот, само три дена по настанот, а судија на претходна постапка му одреди осумдневен притвор, кој беше заменет со куќен притвор, со образложение дека постои можност за бeгство затоа што пејачот има двојно државјанство, македонско и американско, бидејќи до лани со семејството живееше во САД.