Папата Лав Четиринаесетти го крена алармот за употребата на вештачка интелигенција во војната и повика технологијата да се „разоружи“ и да се спречи да „доминира над човештвото“.
Во документ познат како енциклика – папско писмо во кое се изложува перспективата на црквата за клучна тема, Лав рече дека вештачката интелигенција никогаш не треба да се користи за донесување смртоносни одлуки и предупреди дека четботовите и другите алатки за вештачка интелигенција никогаш не треба да се изедначуваат со луѓето, пишува „Политико“.
Енцикликата ја означува најсилната интервенција на Католичката црква во глобалната дебата за тоа како вештачката интелигенција ја обликува иднината на војувањето, трудот и општеството. Текстот ризикува да го стави Ватикан во судир со владите кои се натпреваруваат да ја распоредат вештачката интелигенција како стратешко оружје.
„Магнифика хуманитас“ е прва енциклика на папата Лав 15 од неговиот избор минатата година. Нагласувајќи го нејзиното значење, тој презеде необичен чекор да ја презентира лично, во придружба на канадскиот технолошки милијардер Кристофер Олах, коосновач на гигантот за вештачка интелигенција „Антропик“.
Во своето писмо до католичките бискупи и верници ширум светот, Лав ја опиша вештачката интелигенција не само како технолошко прашање туку и како пресвртница за цивилизацијата. Енцикликата става посебен акцент на опасностите што ги претставуваат автономните системи на оружје, алгоритамското донесување одлуки и одвојувањето на човечката одговорност од воените акти.
Папата, кој има постдипломски студии по математика и некогаш предавал физика, не ја отфрла целосно вештачката интелигенција. Но, неговата енциклика нагласува дека вештачката интелигенција мора да остане потчинета на моралните принципи и новите законски рамки, осигурувајќи дека новите технологии „вистински му служат на човештвото“.
„Ниеден алгоритам не може да ја направи војната морално прифатлива“, напиша тој, инсистирајќи дека вештачката интелигенција мора да биде подложена на најстрогите етички ограничувања и одговорност во војувањето. „Секоја технологија што олеснува напади без да се види лицето на човечките суштества го намалува моралниот праг на конфликтот“.