Триесет лица се исчезнати, а многумина се плашат дека не се живи откако ноќва изби лавина предизвикана од земјотрес која што затрупа хотел во скијачкото туристичко планинско место во регионот Абрузо во централна Италија.
Во хотелот „Ригопаино“ во гратчето Фариндола имало 20 до 30 гости неброејќи го персоналот, кога удрил земјотресот кој повлекол лавина.
Спасувачите се бореа во тешки временски условии да стигнат до хотелот на 1,200 метри надморска височина во четири часот утрово.
„Не бевме во можност да направиме многу. Целата инфаструктира беше во колапс. Toa e повеќе куп од урнатини отколку хотел,” рече Антонио Крочета, член на алпинската спасувачка единица.
Спасувачите стравуваат дека и она што е останато од хотелот може да пропадне целосно и така, дури и да има преживеани, тие нема да можат да се извлечат.
„Не слушаме гласови, постојано довикуваме дали некој ќе не чуе, копаме и бараме луѓе, но засега ништо“, вели тој.
Засега се знае за двајца преживеани кои што не биле внатре во хотелот кога удрила лавината. Еден од нив, Џанпаоло Парете, излегол да земе нешто од автомбилот кој бил паркиран надвор, оставајќи ги сопругата и двете деца во хотелот.
Пронајдено е тело на една жртва кое што било во лобито на хотелот (види слика горе).