Веста дека ТЕЦ Неготино ангажира бесплатен превоз на вработени за Парадата на гордоста која на 29 јуни ќе се одржи во Скопје е лажна.
Вчера повеќе интернет портали копирајќи иста вест – објавија дека вработените во ТЕЦ Неготино наводно биле писмено известени од директорот на Управниот одбор Небојша Стојановиќ дека „раководството на ТЕЦ Неготино ги почна подготовките за учество на нивните вработени на најавената Парада на гордоста во Скопје на 29 јуни и ги повикува сите кои сакаат да учествуваат да се пријават бидејќи ќе бил организиран превоз. Ова е документот кој вчера го објавија повеќе портали, без да ја проверат автентичноста и вистинитоста на веста.
Денеска од компанијата соопштија дека објавените информации се невистини, неточни и служат за манипулација. Од таму исто така наведуваат дека ниту еден новинар не се јавил во компанијата да ја провери веста или автентичноста на документот.
„Што се однесува на објавениот документ, т.е. наводното известување од страна на претседателот на Управниот одбор на АД ТЕЦ Неготино, дека е обезбеден бесплатен превоз за Парадата на гордоста во Скопје, истиот е фалсификуван и обработен со алатки за обработка на електронски фотографии.
Од нас не е побарана никаква информација, а за тоа ќе бидат поднесени соодветни претставки до релевантните медиумски регулаторни тела.
Бидејќи овие објави имаат намера да нанесат нарушување на угледот на АД ТЕЦ Неготино, информираме дека АД ТЕЦ Неготино уште во текот на денешниот ден ќе ги покрене сите потребни постапки пред надлежните институции во Република Северна Македонија заради расчистување на случајот. Во тој контекст ќе бидат преземени потребните мерки кои стојат на располагање во правниот систем на нашата држава. Индициите кои веќе постојат, АД ТЕЦ Неготино им ги предочи и на Министерството за внатрешни работи и на Основното јавно обвинителство“, сопшти генералниот директор на компнијата Небојша Стефановиќ.