Либерално-демократската партија обвинува дека Битола не функционира нормално и дека градоначалникот Владимир Талески, во интерес на сите граѓани, мора веднаш да поднесе оставка.
Според нив директорите на неколку училишта во градот се со поминат мандат и одлуките кои ги донеле во овој период не можат да бидат законски и не се одржливи.
-На директорот на Битолската гимназија, ВД мандатот му истекол на 11.07.2016 и истиот до сега не добил продолжување.
Директорката на средното медицинско училиште и покрај тоа што е под истрага за “Транспортер“, направи долг од 250.000 евра, доби две препораки од антикорупциската комисија за нејзина смена, сеуште безгрижно седи во директорската фотелја а мандатот и истекол на 10.07.2016. Јавно прашуваме, што треба да направи за истата да биде сменета од директорското место?
ВД мандатот уште на 29.07.2016 и истекол и на директорката на “Кирил и Методиј“, а во “Ѓорги Сугаре“ решението за избор истекува за два дена.
Овие аргументи покажуваат дека во Битола владее организиран хаос, а ДПМНЕ продолжува да ја негира реалноста која му се случува на градот, велат од ЛДП.
Партијата предлага на 11. декември заедно со предвидените парламентарни избори да се одржат и избори и за градоначалник, а дотогаш Талески да си поднесе оставка.
Битолскиот градоначалник Владимир Талески веќе три месеци е во притвор како осомничен во случајот Транспортер на Специјалното обвинителство. Талески и уште 22 лица се товарат за проневера на илјадници евра со училишниот транспорт во Општината.