Утрово на полиците во маркетите има полубел и бел леб по цена од 30 и 33 денари. Пекарската индустрија вчера најави дека од денеска ќе почне да испорачува бел и полубел леб но ќе поведе и правна постапка за наплата на штетата по владината одлука за замрзнувањето на цената заклучно со 31 мај годинава.
„Пекарската индустрија е жртва на безумието и одлуките што се носат на штета на пекарската индустрија. Одлуките што Владата ги донесе прават огромни штети и загуби на индустријата на месечно ниво кои се во износ од над 1,5 милиони евра. Поради наметнатите загуби, пекарската индустрија е принудена да се приспособи и да ги намали цените за одредени видови леб, но и да го намали бројот на вработени за да опстане во иднина“, рече претседателот на Групацијата Горан Малишиќ.
Тој истакна дека Владата нема чувство за новонастаната ситуација и притоа е „свесна дека со ваквите популистички мерки уништува стратегиска индустрија“.
„Доколку оваа одлука помине сега во делот на производството на леб, тогаш истото ќе се случи и со остатокот на прехранбената индустрија, за што веќе сведочат и денешните изјави на премиерот дека се планира замрзнување на цените на производите и на други производи“, изјави тој по денешниот состанок на членовите на Групацијата откако Владата донесе одлука со која ги обврза трговците и производителите на леб да обезбедат леб по замрзната цена.
Малишиќ објави и дека ќе ја тужат Владата „бидејќи владините одлуки се незаконски и неуставни“.