Published: Thursday, March 10, 2022 13:13
Само 3 проценти профит на основните прехранбени производи ќе смеат да стават трговците на мало на крајната цена.
Од Министерството за економија велат дека со најновата одлука на Владата, од која се изземени овошјето, зеленчукот, пченицата и солта, ќе се ограничи маржата за лебот, бел и полубел (цел и сечен на парчиња), сончогледово масло за јадење (без ладно цедено масло), брашно од пченица-Тип 400, бел шеќер, трајно кравјо млеко со масленост 2,8%, 3,2% и 3,5%, свежо месо и сувомеснати производи, бело крајво сирење и сирење мешано кравјо и овчо, урда кравја, македонски бел ориз, јајца од кокошка и тестенини (шпагети и макарони од мека и дурум пченица).
Крајната маржа за трговците на големо, за овие производи се ограничува на 4 отсто.
Од Министерството за економија велат дека во договор со стопанските комори три категории на производи, леб, масло за јадење и брашно ќе се продаваат без заработувачка, односно по набавна цена.
Ограничувањето на маржите, според последната одлука на Владата ќе биде на сила до 31 мај.
Дополнително, се воведува целосна забрана за извоз на сончогледово масло за јадење , мерка која е времен карактер. Забраната важи за сите држави.
“330 тони сончогледово масло за само една недела биле извезени од Северна Македонија. Иста ваква мерка може да се воведе и за пченицата, пченката и брашното бидејќи имаме сознанија дека кај некои соседни земји како на пример Грција има интерес за увоз на пченица и брашно”, вели министерот за економија, Крешник Бектеши и додава дека анализите се уште се во тек.
Ќе увезуваме масло за јадење од сите земји во светот, со нула царина
Според министерот, во вторник се очекува воведување на автономна мерка, дозвола за увоз на сончогледово масло за јадење со нула проценти царина од сите земји во светот, а не како досега, само од земјите членки на ЦЕФТА. Царината за увоз на зејтин од земји надвор од ЦЕФТА сега изнесува 29 отсто.
Во однос на овошјето и зеленчукот кои останаа изземени од мерката за ограничување на маржите, Бектеши вели оти тоа се должи на увозот на овие производи од Турција.
“Нашите анализи покажуваат дека се намалуваат фактурите за увоз на овошје и зеленчук што ни ги доставува Цариснската управа. Ова посебно важи за увозот од Турција бидејќи тие го изгубија пласманот на овие продукти во Украина, што не води да веруваме дека цените на овошјето и зеленчукот кои ќе се увезат од Турција за крајниот потрошувач ќе бидат пониски од моменталните цени”, рече Бектеши.
Инаку, Предлог-измените на Законот за ДДВ и на Законот за акцизи, од Владата денеска ги испратила во Собранието.
На 1 март годинава, Владата ги ограничи маржите за основните прехранбени производи на 5 отсто за трговците на големо и 10 проценти за трговците на мало. Во оваа одлука, тогаш беа вклучени и овошјето и зеленчукот.
(Б.Божиновска)