Наместо ден за празнување, 7 април Денот на здравството за матичните лекари ќе биде ден за протест.
Од Здружението на приватни лекари ги повикаа сите колеги, докторите и медицинските сестри од примарните здравствени установи, утре во 12 часот да го изразат своето незадоволство на мирен протест пред Министерството за здравство.
„Овој е трет протест и го правиме за сите нас. За да има доктори и медицински сестри во секое населено место. За да останат и младите во државата, а возрасните доктори да можат да работат достоинствено до пензија. Милион закони се сменија, огромен број на министри се сменија, но само законот за доктори останува ист“, вели доктор Лилија Чолакова Дервишова, претседател на Здружението.
Таа алармира дека голем број помали населени места останаа без доктори, стоматолози и медицински сестри.
„Се е поскапено, покачена е просечна плата, индустриската струја, горивото, храната, но пари за капитационен бод никако да се најдат, пари за плаќање услуги кај специјалисти приватни никако да се најдат, буџети на приватни лаборатории никако да се покачат 16 години“, вели Чолакова и го повика економскиот совет на Владата итно да обезбеди пари за покачување на капитацискиот бод, но и да обезбедат буџет за специјалистичките амбуланти и лаборатории.
Поддршка за протестот, матичните лекари добија и од нивните колеги, приватните стоматолози.
Матичните доктори со години се жалат дека наместо да лекуваат пациенти, се занимаваат со обемна и често непотребна документација. Затоа бараат пациентите на хронична терапија да не мора секоја година да ја продолжуваат со посета на лекар специјалист, односно хроничната терапија да биде доживотна. Дополнително повикаа да се укине казнената политика на ФЗО за административни грешки.
Ова е трет протест за два месеци на матичните доктори. Тие во февруари и во март, еднократно го бојкотираа работењето со Мој Термин, но примаа само итни случаи. На средба со заменик министерот за здравство, уште при првиот протест им беше ветено дека ќе се формираат работни групи за да се најде заедничко решение за проблемот, но тоа до денес не се случи.
Тогаш од Министерството ветуваа и гарантирана плата за лекарите и медицинските сестри, но и укинување на казнената политика за административни грешки.
(Б.Б.)