Тројцата лекари обвинети за смртта на родилката Маја Кадиева и нејзиното бебе минатата година во болницата во Гевгелија, не прифатија вина на денешното судско рочиште и негираа дека биле под дејство на алкохол за време на работата.
На наредното судење за сведок е повикан и сопственикот на кафулето каде што пиеле лекарите.
Сопругот на починатата Кадиева, Димитар Кадиев вели задоволен е што судењето конечно почнало и се надева дека брзо ќе заврши.
– Задоволен сум што почна. Наредните две рочишта се закажани набрзо во декември и очекувам брзо да заврши случајот, вели тој, додавајќи дека очeкува обвинетите да не го одолговлeкуваат случајот.
Рочиштето утрово се одвиваше во Велес. За случајот се обвинети двајца гинеколози и еден анестезиолог за „тешки дела против здравјето на луѓето“.
Маја Кадиева и нејзиното бебе починаа ноќта меѓу 22 и 23 октомври минатата година во болницата во Гевгелија, при нестручно изведено породување, а истражните органи докажаа дека анестезиолозите биле пијани за време на царскиот рез.
Смртта на Кадиева настанала поради комплетен прекин на доводот на кислород и задушување, поради што се задушило и бебето во утробата на мајката, покажа извештајот од Институтот за судска медицина.