Дополнително ќе се утврдува и колку пациенти досега биле оперирани во ПЗУ „Д-р Сци.мед. К. Митаноски“ од кога лекарот Звонко Николовски од ПЗУ “Јанита“ вршел интервенции во изнајмената операциона сала и врз основа на кој документ го правел тоа
Забрана за вршење дејност заради намање на кадар изрече ДСЗИ на ПЗУ „Д-р Сци.мед. К. Митаноски“каде што била извршена интервенцијата на 38 годишниот Булент Ибраим кој почина минатата недела во Градската болница“ 8 Септември“. Забрана за вршење на здравствена дејност доби и ПЗУ “Јанита“ заради вршење на здравствена дејност надвор од дадената дозвола од Министерството за здравство, односно за вршење на интервенции во простории кои не се опишани во решението од Mинистерството.
Во ДСЗИ велат дека на носителот на дејност во ПЗУ „Д-р Сци.мед. К. Митаноски“кој е пензионер му е наложено во рок од 3 дена да ја достави потребната документација.
„Со решение изречена е забрана за вршење на здравствена дејност, заради намање на кадар на носителот на дејност во ординацијата кој по негова изјава е пензионер. (согласно чл. 60 од Законот за здравствената заштита, здравствената установа може да врши здравствена дејност ако се исполнети условите по однос на простор, опрема и кадар за вршење на определен вид на здравстаена дејност односно специјалност).
Доставено е писмено барање за доставување на точни и целосни податоци и неопходни за инспекцискиот надзор со кое ќе треба да се утврди од кога носителот на дејност е во пензија, М1/М2 за вработениот кадар, лиценца за работа, дали има доставено известување до МЗ дека ординацијата не работи, како и податоци за тоа на кои здравствени установи , односно здравствени работници се изнајмува просторот (согласно член.28 од Законот за инспекциски надзор).
Доколку субјектот на надзорот не ги обезбеди бараните податоци, согласно чл.63 од ЗИН, на правното лице ке му се изрече глоба од 3000 евра во денарска противвредност, односно од 300-450 евра за физичко лице.
Во однос на ПЗУ Јанита, специјалистичка ординација по општа хирургија, по извршениот вонреден инспекциски надзор исто така изречена е забрана за вршење на здравствена дејност, заради вршење на здравствена дејност надвор од дадената дозвола од Министерството за здравство, односно вршење на интервенции во простории кои не се опишани во решението од Mинистерството“ велат во ДСЗИ.
Сопругата на починатиот Булент за НОВА: Одговорност за неговата смрт мора да има
Од таму потенцираат дека писмено е побарано да достават точни и целосни податоци неопходни за инспекцискиот надзор со што ќе треба да се утврди од кога носителот на дејност од ПЗУ „Јанита“ врши интервенции во просториите на специјалистичката ординација по пластична и реконструктивна хирургија на ПЗУ „Д-р Сци.мед. К. Митаноски“, врз основа на кој документ се врши тоа, како и на колку пациенти до сега е интервенирано во овие простории.
НОВА неофицијално дознава дека докторот кој го оперирал Булент имал поголема листа на интервенции кои ги нудел иако за тоа немал операциона сала.
Останува нејасно, како Министерството за здравство издало дозвола за вршење на овие интервенции кога ПЗУ „Јанита“нема сопствена опарциона сала.