Министерот за здравство Венко Филипче соопшти дека денеска треба да се знае кога ќе стигне лекот за пациентите со цистична фиброза и изрази надеж дека тоа ќе биде до крајот на неделава.

– Вчера пробавме и во секторот за ретки болести да комуницираат со добавувачите. Вчера не одговорија, денеска очекуваме да ни кажат. Треба да стигне од Велика Британија, рече Филипче.

Тој додаде дека по денешната прес-конференција ќе провери дали има одговор.

– Тоа што се обидовме и со меилови да искомуницираме, да се прати лекот по ДХЛ да стигне што поскоро, а во МАЛМЕД да направат постапка за одобрување на пуштање на лекот во промет и покрај тоа што официјално постапката не е завршена. Сега имаме јавна административна пречка, ама ќе ја надминеме, нагласи Филипче. Додаде дека разговорал со директорот на Агенцијата за лекови и медицински средства Љирим Шабани, кој, како што истакна, рече дека ќе излезат во пресрет.