Набавка на лекови доцни поради проблеми во Советот за јавни набавки, а не во Министерството за здравство, изјави денеска министерот Арбен Таравари.
– Има еден Совет за јавни набавки кој е комплетно политизиран. Фирми кои добивале и поминувале низ тој Совет пред шест месеци, сега кога конкурираат за да направат проблем, не спречуваат и затоа се јавуваат проблеми со лековите, рече Таравари.
Појасни дека иста фирма конкурирала со исти стандарди пред шест месеци и немало проблем, а сега истата фирма со истите стандарди кога конкурира има проблем пред Советот за јавни набавки.
Информира дека е побарано од премиерот да изнајде решение да се прекине таа пречка.
– Секаде каде што требало сме направиле интервентен увоз но тоа чини многу повеќе. Би сакал да знае целата македонска јавност сите тие проблеми што се јавуваат со лековите не е дека не потпишува министерот или тимот во Минситерството за здравство, туку целиот проблем е во Советот. Не знам зошто прават проблеми и дали се по нарачка, рече министерот за здравство.
Таравари истакна и дека во земјава досега биле внесувани лекови од фирми без сертификати. Притоа рече дека неговиот тим работи на промена на законот за лекови и медицински средства со кои ќе се регулира внесувањето на лековите во државата, односно право на продажба на лекови во Македнија ќе имаат само сертифицирани фирми.
Министерот за здравство, кој сега е кандидат за градоначалник на Гостивар на денешната прес конференција за оствареното во првите 100 дена Влада, како еден од поважните проекти започнати во првите 100 дена, го истакна предлог – законот за здравствено осигурување, со кој се предвидува ослободување од партиципација на лицата кои користат социјална парична помош. Се работи за група од 4.000 до 6.000 лица.
Во првите три месеци, Министерството за здравство започна повеќе проекти кои останаа недовршени, како проектот за трансплантација на органи, изработка на акциски план против хепатит, отварање на Центар против аутизам и предлог за имена на Законот за заштита, кој е во договор со сите здравствени здруженија и лекарски комори.
Таравари рече дека поради кампањата која започнува в понеделник, ќе земе одмор и не ќе може да се занимава со реформите во здравството.
-Јас нема да можам да работам на овие проекти, но тука ќе биде мојата екипа која ќе продолжи со истото темпо како и во првите 100 дена, тука е заменикот министер, секретарот кои ќе ги водат овие проекти и не се сомневам дека ќе ги истуркаат до крај, рече Таравари.