Темелко Ристески: Линеарното усогласување на пензиите, заснованоно на интервенциите со измени и дополнувања на членот 37 од Законот за ПИО, долго време е тема во пензионерските кругови, а и пошироко. Неговите поддржувачи, претежно од редовите на граѓаните со ниски пензии, тврдат дека тоа е праведно и уставно затоа што цените на стоките и услугите растат подеднакво за сите.
Противниците пак, тврдат дека не е уставно затоа што влоговите на граѓаните во Фондот за ПИОМ не се еднакви. Против Законот за изменување и дополнување на Законот за пензиско и инвалидско осигурување („Службен весник на Република Северна Македонија“ бр. 154/2025). со кој се интервенира во членот 37 од истиот закон, се поднесени неколку иницијативи.
Подносителите на иницијативите за оценување на уставноста на линеарното усогласување на пензиите, меѓу кои беше и мојата маленкост, како основно тврдеа дека линеарното усогласување (зголемување) на пензиите пропишано со член 2 од наведениот закон ја нарушува уставната еднаквост на граѓаните, правото на сопственост и начелото на социјална сигурност, бидејќи еднакво ги третира пензионерите со различни придонеси за пензиско и инвалидско осигурување.
Кон крајот на декември минатата година Уставниот суд не донесе одлука за поведување постапка за уставноста на спорниот член од Законот за ПИО затоа што господата уставни судии се поделиле во ставовите фифти-фифти и донесувањето на одлука го одложи до комплетирањето на судот со судии. Веднаш штом слушнав за ова, помислив дека Судот ќе тактизира во интерес на политиката на Власта и дека нема да донесе одлука до истекувањето на важноста на законот .
Според вчерашното соопштение на Судот, тој ја запрел постапката за оценување на уставноста на член 2 од Законот за изменување и дополнување на Законот за пензиското и инвалидското осигурување. Во сила останува т.н. линеарното зголемување на пензиите. Според Судот отпаднал сомнежот за неуставност на оспорениот закон
Според член 39 од актот на Судот, Уставниот суд ќе ја запре постапката покрај другото ако: – во текот на постапката, законот, другиот пропис или општ акт престанале да важат, а не наоѓа основи за оценување на нивната уставност, односно уставност и законитост во време на важењето. Оспорениот закон престанал да важи пред некој ден – на 28 февруари.
Господата уставни судии не се потрудиле да најдат основи за оценување на уставноста на Законот и одвај чекале да истече неговата важност за да ја запрат постапката за неговата уставност. Како поинаку би постапиле мнозинството од нив, кутрите за да не се замерат со Власта. Вака се најсигурни. Важноста на законот истекла. Тие ја запреле постапката. Власта нема да им замери. Волкот е сит но, во случајов, овците не се на број.
Од Фејсбук ѕидот на авторот