СДСМ денеска побара веднаш да прекине неразумното однесување на Никола Груевски и раководството на ВМРО-ДПМНЕ, бидејќи како што изјави Дејан Павлески, претседател на Комисијата за локална самоуправа на СДСМ „овие неодговорни луѓе преку закани за насилство го блокираат целиот државен систем, што за три недели би се прекршило врз егзистенцијата на граѓаните со хаос во државата“.
За три недели, на 15 мај, градоначалниците и советите на општините целосно ги губат своите ингеренции и овластувања. Со блокадата на Собранието, пратениците на ВМРО-ДПМНЕ го блокираат и изборот на новиот собраниски претседател кој единствено може да ги закаже локалните избори. Во вакви услови, кога нема нов датум за локалните избори, а градоначалниците и советите целосно ги губат своите овластувања, се доведува во прашање целокупната работа на Општините, како и работата на јавните претпријатија, училиштата, градинките, дневните центри за социјална грижа и сите установи под општинска надлежност, рече Павлевски.
Тој објасни дека ова ќе значи дека: граѓаните ќе останат без еднократната социјална помош што им следува по закон,вработените во училиштата, градинките, културните установи од локален карактер, како и вработени во противпожарните единици и во другите општински установи нема да можат да земаат плата, привремено ангажираните работници во општините нема да може да го добијат својот паричен надоместок, нема да може да се издаваат одобренија за градба, решенија за легализација на бесправно изградени објекти и други слични решенија,нема да има кој да потпише акти кои произлегуваат од општинските штабови за заштита и спасување, доколку е тоа потебно, со што се доведува во ризик безбедноста и здравјето на граѓаните.
-Укажуваме дека единствено Собранието на Република Македонија е овластено да донесува, изменува и дополнува закони. Уставниот суд не може да го реши проблемот. Поради тоа единствено решение на овој проблем што го создаде Груевски, преку Трајко Велјаноски, пратениците на ВМРО-ДПМНЕ и Ѓорге Иванов, е итна деблокада на демократските процеси, изјави Павлевски.
Од СДСМ уште еднаш го повикаа Груевски и раководството на ВМРО-ДПМНЕ да се откажат од насилието и да овозможат да продолжат демократските процеси за да се избере нов собраниски претседател кој ќе ги закаже локалните избори, како и да се овозможи мирен трансфер на власта.
-Да не се плашеше СДС од сопствениот народ, локални избори заедно со нови предвремени парламентарни избори ќе имаше во првата половина на мај. Да не му беше на СДС поважна Тиранската Платформа и континуираното провоцирање на кризи, граѓаните ќе гласаа согласно законот на 7-ми или на 14-ти мај, односно за две недели од сега, се вели во реакцијата од ВМРО ДПМНЕ на прес конференцијата на Павлевски.
ВМРО-ДПМНЕ го повикува СДСМ, како што се вели, „да собере храброст и да излезе на локални избори кои би се одржале на ист трошок, заедно со предвремените парламентарни избори“.