Зоран Иванов
Мицкоски денеска пред новинарите рече дека милост ќе немало да имаат и дека за уши од дома ќе ги ваделе.
Ашколсум.
Фино кажано тоа за милост што ќе немале.
Уште поубаво што за уши од дома ќе ги ваделе.
Тоа со ушите му е посебно симпатично. Искуствено.
За ушите влечења навежбани се уште од бомбите предизборни. Од тогаш кога за уши ги влечеа. Оние, нели, човечињата. Кога во луѓето не гледаа луѓе. Кога во човечињата гледаа гласови. Гласови коруптивни.
И што сега би било различно за мотивите за влечењето за уши освен што првото беше влечење од пустец до изборните кутии, а ова сега, премиерсково, би било влечење од дома па до …
Методите исти, актерите исти, локациите различни.
Оттука, кога ќе почнат корумпираните за уши од дома да ги вадат, ќе треба и себеси за уши од дома да си се извадат.
И другите, секако. И претходните и идните.
Но бидејќи сега се власт и алатките за ушите и за влечењето се кај нив, би било показно, онака школски, од себе да почнат.
Колку за пример.
Да почнат од банката македонска па октата грчка па, …, па се до денес. До плацевите водњански и палатата бела и, посебно, од титулата најбогата, аналогно и најкорумпирана партија европска.
Влечење по ред. Од тогаш, откај банките и октите, па се до сега, до тендериве информатички и сертивикативе бугарски или обратно, сеедно.
Ќе има влечења за уши и тоа онака робусно.
Впрочем, во трите македонски плурални декади се изнагледавме корупции тони. Корупции ни се врежаа како колективни мемории.
Партизизации и корумпирации од горе па удолу се до дното каде што ја спуштија напатена Македонија.
Затоа, ајде без блефирања.
Без силења популистички. Без фрлања правови и без сеење магли зашто корупцијата ниту е од сега ниту пак вие не сте во неа.
Дејствувајте, обвинувајте, докажувајте, затворајте.
А тоа за ушите? Хм.
Тоа не е ниту за мали деца.