lu-ping / Објектот не е на државата туку е на Аеро клубот и на скопјани  

Се пофали министерот вице премиер Николовски дека нема да го урива бесправно изградениот објект на спортскиот Аеродром во скопски Стенковец.

Државата ќе го легализирала и ќе го дала на користење на државната Агенција за воздухопловство.

Фино.

И очекувано.

Објектот е граден со пари на членовите на Аероклубот „Скопје“ и со, објавија од клубот, плус сто илјади евра донација од ЕУ, пари наменети за скопските воздухопловци, аматери и ентузијасти.

Објектот го градеа тие самите. Тие.

Исто како што тие самите ја изградија и тревнатата писта на спортскоиот аеродром на стенковечката локација и кои на времето на раце го преселија металниот хангар од стариот спортски аеродром од сегашната истоимена скопска населба и општина.

Самите со своите раце и со својата пот.

И сега министере и држава Македонија, најмалку е фер да им го одземате објектот на вистинските градители и сопственици.

Секако дека е убаво што министерот и државата ќе го легализираат објектот на спортскиот аеродром „Скопје“ кај Стеновац, но не е убаво што сакаат да го конфискуваат.

Да го узурпираат и да го одземат од тие на кои де факто им припаѓа и на кои им е потребен за нивните едукативни и спортски активности.

Ако државата бар малку, конкретно власта, се грижи за санирање на дефицитот од пилоти, едриличари и падобранци, за толку потребниот а толку дефицитарен кадар за разни редовни и посебно за разни вонредни случувања, тогаш рационално би било и да не им ги одзема елементарните услови на воздухопловците волонтери.

Еве и шанса да покаже разбирање и грижа. Барем толку Македонија може да им учини на скопските воздухопловци. На спортистите ентузијасти и волонтери со над стогодишна традиција.

Да го стори тоа на готово и да им го отстапи на трајно користење на воздухопловните моделари, на спортистите падобранци, на спортските пилоти на едрилици и на пилотите на спортските и на малите комерцијални авиони.

Патем, на времето, управувана токму од менталитетот на оваа идентична власт, државата ги набрка воздухопловците спортисти од нивните децениски простории во центарот на Скопје, а сега истата таа „хумано“ се фали дека објектот диво изграден и со ЕУ пари, немала да го руши туку ќеда го дадела во сопственост на државната Агенција за воздухопловство која одамна потфрли со отсуството континуирана грижа за обнова на воздухопловниот кадар и дозволи аеро клубовите во земјава материјално да бидат игнорирани и запоставени.

А токму тие, аеро клубовите, некогашните воздухопловни школи, се единствениот извор на македонскиот воздухопловен потенцијал.

Впрочем, да повторам за да не се заборави дека аеродромот со „голи раце“ го градеа генерации членовите на скопскиот аероклуб, па и „дивиот“ објект и металниот хангар и пистата не се на државата туку со тапија тие се на градот Скопје и им припаѓаат на членовите на Аероклубот „Скопје“ и на скопјани.

Значи, пак, објектот не го градеше државата и не е на државата туку е на Аеро клуб „Скопје“ и на скопјани.

При крај, збор, два за граѓанските реакции за узурпациите од страна на државата на диво изградените објекти.

Таа, јавноста, овој пример со конфискувањето и со легализацијата на диво изградениот објект во Стенковец, го посочува како фина опција државата која толку се сили на волонтерите воздухопловци, истите мускули да ги употреби и за конфискување на диво изградените станбени блокови и по истата аналогија да постапи и со бесправните станбени блокови.

На оние во Чаир и на сите други низ државава.

Да ја провери нивната безбедност и дивите станбени згради да ги додели на министерството за труд и социјална политика за во нив да згрижува социјално загрозени семејства.

И да даде пример дека и урбаното дивеење не се исплатува и дека стопанот на државното е државата.

Наше, на јавноста, е да потсетиме. Алатките се кај министрите.