lu-ping /  Поентата не е во тепањето туку во криминалот но за тоа одговор не побара никој од никого    

Власта со вакви медиуми, посебно со вакви ТВ и со нивните уредници, денеска пак си поигра мајтап со нив и преку нив и со нас граѓаните.

Си поигрува така и со овој случај и со сличните. Со вакви влијателни медиуми, си се мајтапи со правото и со правдата.

При отворени очи јавно преку ТВ екраните поткрепува криминал во кој, според нејзините заташкувачки реакции и премолчување на мотивите за кои градоначалничката се впуштила во службена контрола, очигледно и самата учествува.

Цел ден од екраните не се симнаа ниту Данела, ниту Панче.

Брујат и брмчат и медиумите онака оркестрирано како што власта и посакува, како плот за стап држејќи се до инцидентот во Чаир.

До последицата а, притоа, игнорирајќи ја причината.

Попрецизно, премолчувајќи ги тамошните теренски криминални активности.

Ниту еден медиум не ги праша надлежните има ли криминал на местото каде што градоначалничката беше нападната или Данела навистина си прави ПР?

Никој не праша дали е запрена градбата доколку е навистина на диво.

Ниеден медиум, ниту една ТВ не праша дали до дивиот зградо градител стасала институционална пријава.

Има ли инвеститорот одобрение или нема.

Има ли согласности за приклучоци за вода и струја или нема.

Дали ќе биде напишан налог за уривање или пак е се, сиот тој див криминал однапред, па дури и предизборно договорен.

Данела, тоа камче во чевелот на власта, ќе остане ли само уште една жртва во инцидент или власта сепак ќе мора да ги покрене институциите и нејзините репресивни алатки кога станува збор за криминал.

Или, како да не се случува ништо, со сесрдна помош на се уште популистички влијателните национални ТВ, идентично како денеска, ќе продолжи да ја мавтосува јавноста со вакви и слични инциденти и ќе бега од непоставеното прашање дали објектот предмет на инцидентот, е дива градба или не е.

И дали, ако е, ќе се руши или не.

Или пак, вообичаено, со партиските мнозинства во собранието, ќе се озакони и овој криминал.

Засега, судејќи и по активностите на скопската градоначалничка и по молкот на институциите и на надлежните министри и на другите функционери, ВМРО-ДПМНЕ, ЗНАМ и ВЛЕН, денеска се ставија на страната на криминалот.

Но ако јавноста, медиумите и граѓаните тоа им го одобруваат, ако уредниците не најдоа за сходно да прашаат за криминалот и со своите теренски извештаи и студиски интервјуа успеаја да ја заметнат главната тема, ако намерно или од незнаење го премолчеа главното прашање дали во целиот случај станува збор за криминал или не, ако го фрлија под ќилим клучното прашање за кое денеска одговор не побара никој од никого, тогаш, тогаш …