Зоран Иванов
Цитат: Самостојниот синдикат на новинари и медиумски работници – ССНМ и Здружението на новинарите на Македонија – ЗНМ, изразуваат сериозна загриженост и најостра осуда на зачестените јавни напади, дисквалификации и етикетирања на новинари и медиуми од страна на политичката партија СДСМ. Последниот таков случај се однесува на јавното таргетирање и етикетирање на телевизијата „Алфа“ преку партиски соопштенија и јавни изјави, што претставува директен притисок врз медиумот и неговите новинари.
Убава поента. Така е. Партиите подалеку од медиумите.
Што подалеку.
Туку, тука во ова соопштение некој во ССНМ или некој во ЗНМ, малку како да ги измешал лончињата.
Имено, синдикатот, чија задача во суштина е да се грижи, да реагира, да се бунтува за социјалните правди и неправди врз новинарите, како да ја презема улогата на новинарското еснавско здруженија чија елементарна обврска е да реагира со теми како оваа во соопштение во кое, тема за синдикатот нема.
Но оваа субјективна забелешка ја оставам на внатрешните релации на ЗНМ и на ССНМ.
Суштината на реакцијата на овие редови на овој lu-ping е да ја сподели загриженоста и да ја поздрави и да ја поддржи содржината на конкретново соопштение било да е тоа напишано во ЗНМ или во политички амбициозниот ССНМ, овде е споредно.
Централното е ЗНМ некогаш сепак да се охрабри и да реагира и во спротивна насока.
Новинарските, уредничките, водителските автори да ги потсети и на нивните морални обврски.
Да потсетува на кодексот новинарски, да почне да зборува и за моралните програмски девијации во медиумите, да потсетува на етичките стандарди и да им укажува на уредниците на неморалните медиумски постапки.
Па, и да укажува на екстремните појави во медиумите, на оние кои себеси се преставуваат како информативни гласила, а кои, во суштина, во своите програмски производи, манифестираат стигми и кои без ронка скрупули, говори, изјави, ситуации, вадат од еден и ги сместуваат во друг, во очигледно партиско пропаганден контекст, а го прават тоа затоа што, речено едноставно, им се може.
Но тоа, таквите новинарски местенки кога, во името на една политичка структура за сметка на друга, новинарството игнорира едни за сметка на други факти, кога тврди, обвинува и клевети без да истражи или барем без да праша, кога неосновано јавно и медиумски уредувачки мести, кога пенали партиски конкуренти, тоа, нели ЗНМ, не е слобода на изразување и уште помалку независно новинарство.
Или …
Но, така е ЗНМ, партиите подалеку од медиумите ама, ајде, и уредниците подалеку од штабовите партиски.
И ајде, конечно и конкретно, отворете дебати, анализирајте, изнесете оценки и за медиумите и за нивните уредувачки политики.
Смело и професионално проговорете и за тоа кој како и колку со апла евидентни партиски пропаганди, го труе јавниот простор.
И кој тоа го загадува етерот кој од граѓаните им го довериле.
Не ќе е тоа мешање во медиумските слободи, туку ќе е тоа колегијален еснафски придонес во одржување бар на елементарно коректноти новинарски стандарди.
Ајде ЗНМ и збор, два, соопштение, две „сериозна загриженост“ и за професионалноста во редакциите, за уредниците и за водителите во нив.
Ајде „сериозна загриженост“ и за етиката актуелна медиумска, редакциска, уредничка, водителска – за етиката новинарска.