Кинематограферот Лука Бигаци е добитник на специјалната награда Златна камера 300 за особен придонес во светската филмска уметност на 35. издание на Интернационалниот фестивал на филмската камера „Браќа Манаки“ – Битола, кој годинава ќе се одржи од 13 до 19 септември.
Последниот проект на Бигаци, „Големата убавина“ (La grande bellezza), го освои Оскарот во категоријата најдобар филм од неанглиско јазично подрачје, а победи во истоимената категорија на наградите БАФТА и Златен глобус.
„За нас е особено важно што „Браќа Манаки“ на своевиден начин беше меѓу првите фестивали што го откри талентот на Бигаци, уште во далечната 1997 година, со неговиот прв филм во официјалната програма на 18. издание. Оттогаш неговите филмови впишаа сè на сè пет учества и понесоа две од наградите во Битола. Третиот пат конечно доаѓа лично да си ја земе големата специјална Златна камера 300 на браќата Манаки“, рече Лабина Митевска, директорка на ИФФК.
Бигаци е роден во 1958 во Милано и спаѓа меѓу најактивните и најбараните кинематографери од италијанските режисери. За тоа говорат освоените 20 врвни италијански и светски награди како и дваесетте номинации. Од неговите осумдесетина филмови се одделува ремек-делото „Големата убавина“ кој е тандемска креација со режисерот Паоло Сорентино, со кого четврти пат ставаат заеднички потпис.
Сепак, Бигаци најмногу филмови, повеќе од десет, има снимено со Силвио Солдини. Други режисери кои имале чест да биде зад нивните камерите се Марио Мартоне, Џани Амелио, Феличе Фарина, Микеле Плачидо, Франческа Аркибуги, како и еден од најголемите режисери на денешницата, Абас Кјаростами, во филмот „Верна копија“ со Жулиет Бинош во главната улога. Фестивалот целосно ќе биде во знакот на годинашниот јубилеј, при што слоганот „Кон ѕвездите“ е одраз на таквиот повод.