По лавината реакции на јавноста по веста дека Управата за јавни приходи (УЈП) ќе има 24 часовен пристап до приватните банкарски сметки на граѓаните, директорката на оваа институција Сања Лукаревска на Фејсбук испрати дополнително објаснување на на постапката и особено во делот на заштитата на податоците на граѓаните.
Сакаме да ја информираме јавноста за придобивките за граѓаните и државните институции од спроведувањето на реформата за авоматизирана размена (користење) на податоците од различни, трети страни, вклучително и податоци од финансиските институции.
Воедно, сакаме да појасниме за начинот на којшто тоа ќе се спроведува, имајќи предвид дека се појавија одредени шпекулациии кои немаат врска со реалноста, во делот на заштитата на податоците. Она на што се работи една година наназад е оваа размена на податоци да се автоматизира, наместо податоците да се доставуваат во хартиена форма, што е долга, спора постапка за сите страни.
Автоматизираната електронска размена на податоци со банките ќе овозможи подобрување на ефикасноста на УЈП, подобри услуги за граѓаните и истовремено подобро администрирање на персоналниот данок на доход. Побрзо ќе се издаваат уверенија, решенија и други документи во надлежност на УЈП.
Врз основа на едногодишните консултации со сите релевантни институции, на одржани низа состаноци низа состаноци меѓу Управата за јавни приходи, Министерството за финансии, здружението/асоцијација на банките и претставници од банките, Народната банка на РМ и Дирекцијата за заштита на личните податоци, заеднички се утврди рамката за протокот на овие податоци, нивната содржина, динамика за достава и сл., како и стандардите за сигурност и заштита на личните податоци на граѓаните.
Личните податоци на граѓаните се сигурни, загарантирани и заштитени. Користењето на податоците низ една ваква законска и сигурна процедура е императив за да може УЈП да издава однапред пополнети годишни даночни пријави кои граѓаните само ќе ги потврдуваат. Издавањето на пополнетите годишни даночни пријави е дел од реформата за поедноставување на постапките за плаќање на персоналниот данок на доход, која УЈП ја спроведе со користење на средства од ЕУ ИПА фондовите. Ова е уште едно олеснување, уште една услуга за граѓаните.
Размената или користењето податоци кои се потребни за даночни цели, е вообичаена пракса во многу администрации во Европа, како на пример Данска, Естонија, Шпанија, Грција и др. Ова е случај и во Македонија.
Согласно веќе важечката регулатива, секоја институција која располага со вакви податоци има законска обврска и е должна да ги достави по барање на УЈП. Користењето на податоци добиени од банките во УЈП не е новина, затоа што и до сега истите се користат редовно во даночната постапка. И постојниот Закон за УЈП и Законот за банки кои во моментов се на сила, регулираат дека овие податоци не се банкарска тајна кога се користат од страна на УЈП во даночна постапка и за даночни цели.”