Претседателот на Венецуела, Николас Мадуро прогласи победа на изборите за Уставотворното собрание.
„Имаме Уставотворно собрание. Тоа е најголема победа, што револуцијата ја оствари во својата 18-годишна историја., изјави Мадуро, обраќајќи им се на стотиците приврзаници во Каракас, откако Изборната комисија соопшти дека излезноста била 41,5 проценти.
Опозицијата, сепак, наведува дек изленоста била околу 12 отсто, додавајќи дека власта е подготвена да соопшти дека на изборите гласале 8,5 милиони гласачи.
За време на гласањето, демонстрантите се судрија со безбедносните сили, додека голем број Венецуелци го бојкотираа гласањето за Уставотворно собрание, за кое левичарскиот претседател Мадуро вети дека ќе почне „нова ера на борба“ во земјата која е погодена од криза.
Најмалку десет луѓе биле убиени во Венецуела во изминативе 24 часа откако избувнаа насилства на протестите против претседателот Николас Мадуро и неговиот план да формира ново собрание. Меѓу жртвите имало и две млади момчиња кои биле застрелани на протестите во западната држава Тачира. Исто така бил убиен и еден од кандидатите за новиот парламент. Во неколкумесечните протести против него загинаа над 120 луѓе.
Критичарите предупредуваат дека уставотворното собрание ќе му овозможи на Мадуро да го распушти Конгресот, каде мнозинство има опозицијата, да ги пролонгира изборите и да ги измени изборните правила.