Утревечер, во кафе-книжарницата Магор ќе се одржи промоцијата на книгата „Ѕид што оди“ од Илхами Емин. Книгата ја објави издавачката куќа Магор, а промотор на изданието ќе биде професорот Ферид Мухиќ.
„Романот Ѕид што оди, на истакнатиот современ поет, писател, публицист и преведувач Илхами Емин, е роман за човекот што ја бара онаа интегративна единствена духовна парадигма – розата што ќе ги обедини и на хармоничен начин ќе ги изрази сите благородни и возвишени трагања по највисоката вистина. Во неговото досегашно творештво, пред сè, во поезијата, розата е нагласено зачестен симбол од централно интерпретативно значење.
Во овој роман, најавен со историски автентичната воведна епизода опишана во овој текст, Илхами Емин продолжува да ја раскажува сагата за вечното барање на онаа највисока универзална вистина низ која се изразуваат и во која се помируваат сите парцијални вистини. Олицетворена во ликот на Јурук Осман, приказната тече низ еден исклучително силен автентичен говор, поправо, вистински порој што не запира ниту пресушува, како што навистина течат и нашите мисли – без точка! Оти точката е само интерпункциски знак со кој му даваме време на собеседникот да се соземе, да разбере што му зборуваме.
Но кога сме сами со своите мисли, тогаш таа река не запира, а точката станува одвишна..“, напиша во предговорот за романот, професорот Мухиќ