Во среда, 27 мај, ќе започне исплатата на мајските пензии, информираат од Министерството за труд и социјална политика (МТСП) и втор месец по ред ќе биде предвремената и етапна, со цел поголема заштита на пензионерите во услови на опасност од ковид-19. Пензионерите кои користат платежна картичка поврзана со сметката на која се префрлува пензијата, со парите ќе може да располагаат од среда 27 мај, со подигнување на средствата на банкомат или за плаќање во трговската мрежа.
Подигнувањето на пензиите преку филијалите и експозитурите на банките за пензионерите кои не користат картички ќе се реализира во четири групи, според висината на пензијата:
- Во среда, на 27 мај исплата на пензии до 11.000 денари
- Во четврток, на 28 мај исплата на пензии од 11.001 денари до 14.000 денари
- Во петок, на 29 мај исплата на пензии од 14.001 денари до 18.000 денари
- Во понеделник, на 01 јуни исплата на пензии во висина над 18.000 денари
Етапното процесирање на пензиите, информираат од МТСП, ќе овозможи спроведување на препораките и мерките за спречување и ширење на вирусот, со оглед на тоа што пензионерите како возрасна група се најранливи.
Од МТСП укажуваат дека пензиите се сигурни на сметките на корисниците, пензискиот систем е стабилен и функционира без проблеми и апелираат пензионерите да се придржуваат до распоредот за исплати, затоа што етапната исплата е направена со цел да се намали метежот пред банките и можностите за загрозување на личното и јавното здравје.
Исто така, потсетуваат и на обврската за носење лична заштитна опрема што ги покрива пределот на носот и устата и држење растојание од најмалку два метра при чекање ред пред и внатре во банките.