На реномираниот меѓународен фестивал за анимиран филм во Анеси, Франција, најстар на светот (основан во 1960 година), добитник на втората награда во категоријата краткометражен филм е Александар Џони-Шопов, првиот Македонец што успеа да се пробие на врвот на аниминариот филм на овој фестивал.
Pictureless (Concours Annecy 2013 + de courts) by a_dzone
Џони – Шопов има 30 години и од своето детство живее во Париз, дипломирал на Високата школа за илустрација и анимација Емил Кол во Лион и во Париз, работи како аниматор или дизајнер на декор во повеќе продуцентски куќи и работи на проекти за телевизиски серии.
На фестивалот конкурираа над 200 филмови во различни категории како краткометражни, долгометражни, серии, едукативни. Секоја од овие категории добива награда.
”На конкурсот се пријавив со самостоен проект и добив втора награда. Со оглед на огромната конкуренција и високиот квалитет на пријавените филмови навистина сум пресреќен што се пробив на врвот”, вели Џони-Шопов.
Оваа година тема на категоријата каткометражен филм беше ”Нозете во вода, главата во слики”. ”Оваа тема ме инспирираше во изработката на филмот кој е комична критика на светот во кој живееме и во кој доминира сликата”, вели Џони-Шопов.
Наслов на филмот е ”Pictureless” (Без слики). Еден ден во Анеси се појавува ”мрачниот демон на мрачината” и на граѓаните им го краде најскапоценото: ”Не семејството ниту пријателите туку – сликите! Одеднаш луѓето повеќе не можат да играат видео игри или да гледаат филмови па мораат да се занимаваат со музика, спорт, сликарство…”, раскажува авторот на филмот.
Наградите ги додели американскиот продуцент Брајан А. Милер, генерален директор на Cartoon Network Studios во Калифорнија а членови на жирито беа францускииот новинар Стефан Леблан и американскиот режисер Бил Плимптон.
Oд лево на десно: Александар Џони Шопов (Македонија, Втора награда), Оливје Витра (Франција, Трета награда), Брајан А. Милер (генерален директор на Cartoon Network Studios во Калиформија, Ави Офер, Израел, Прва награда, Патрик Евено (Директор на Меѓународниот фестивал на анимиран филм во Анси)