Коментар на НОВАТВ
Една млада репрезентација, конечно, да ја фати „мајата“ и направи успех што ќе биде како бунар за црпење надежи за „подобро утре“
Македонскиот фудбал се најде во долгоочекуваната пол-позиција. Една млада репрезентација да ја фати „мајата“ и направи успех што ќе биде како бунар за црпење надежи за „подобро утре“. Пласманот на младата репрезентација на Европското првенство во 2017 година е токму тоа и значи огромна придобивка за иднината на А тимот на чиј праг стојат половина од составот што испиша историја.
Летвичката на вредности е подигната на респектибилно ниво и спуштање под тоа не смее да се дозволи од аспект на играта и залагањето на терен. Пристапот мора да остане ист и во натпреварите да се влегува со мисла како да се победи наместо да не се загуби. Со таков микс, во најмала рака, ќе се дофати континуитет на конкурентност наместо набрзина да се излегува од игра.
Односите со „среќата“ што знаеше да биде чест изговор досега треба да се стават „под мраз“. Младите репрезентативци во изминатите девет средби покажаа дека можат против секого и секаде што го стеснува просторот за ложење на неа. Единствено прифатлива улога на фортуната е при ждрепка. Во случај да нè „погали“ за квалификациските групи за наредното ЕП, сениорско се разбира, тогаш за очекување е бум во 2020 година. Ако не, како пик останува мундијалот во Катар две години подоцна со составот со кој ќе пулсира цела нација наредното лето.
Зошто велиме дека македонскиот фудбал е во пол-позиција? – Затоа што оваа генерација на фудбалери е со рок на траење најмалку 10 години што во превод значи шест циклуси, по три за европски и светски првенства. Се разбира, ако играчите ги послужи здравје, ги заобиколат повреди што би значеле забавување во развојот и кариерите што директно би се одразило на националниот тим. Тоа, секако, никој не го посакува.
Вториот момент е директно поврзан со европското првенство во Полска. Самиот пласман е огромен успех, секој резултат ќе биде само бонус. Меѓутоа суштината, во позадина, лежи во самото присуство на турнирот што по традиција важи за саем на играчи. Настанот е магнет за инсталирање на штандови на сите клубови со статус на гиганти на континентот од Рејкјавик до Истанбул и од Астана до Лисабон.
Мечевите, по правило, ги следат бројни менаџери што работат за најмоќните фудбалски семејства. Па, секоја евентуална препорака на производ „со сонценце“ што би завршила во форма на и-мејл или смс кај, можеби, Мурињо, Клоп, Енрике, Симеоне, Анчелоти ќе биде рамна на бинго. За поединецот од финансиски аспект и услови за натамошен напредок што би било огромен плус и за репрезентацијата за која се секогаш добредојдени одлично сервисирани играчи од клупските средини.
Третиот момент е европскиот фокус во потрага по фудбалски материјал или свежа крв, како сакате, на овие 25,713 квадратни километри. Пласманот на ЕП 2017 се претпоставува дека ќе биде мамка за почеста посета на скаути на македонскиот пазар и пројавување на интерес за понудата, за воспоставување на поблиски релации со овдешните клубови, за запознавање во живо со кадровските потенцијали. Секое поклопување со побарувачката ќе биде додатен импулс за останатите во исчекување на своите пет минути.
Македонија ќе биде во Полска на лето. Сцената ќе биде младинска, но скелето на кое ќе стои е со сениорски темели. Шансата што нуди фудбалска перспектива мора да искористи. Иако се уште под силни импресии од вторникот, јавноста со нетрпение ја очекува ждрепката во ноември. За настапот на ЕП не треба да се трошат зборови.
Дотогаш често ќе се навраќаме на две евергрин изјави од дамнешно и поново време. Првата излезе од устата на маршалот Тито што повозрасните граѓани ја паметат како „оче наш“ и гласи „земја што има ваква младина, не треба да се грижи за својата иднина“ и во случајот е во фудбалски контекст. Втората е онаа легендарна „Леле луѓе што направивме“ на Влатко Илиевски по одличниот пласман на кошаркарите на Европското првенство во Литванија.
Младите фудбалски репрезентативци треба да добијат силна порака за поддршка на стореното и за она што ќе следува. Најдобро се илустрира низ онаа заштитната на навивачите на Ливерпул – „You will never walk alone“ што кога ќе грмне од популарниот Коп на „Енфилд“ човек го обземаат морници. Потоа се очекува менување на курсот од младинска кон сениорска насока со надеж дека во скора иднина ќе може да се слушне и македонско „хук“ налик на симпатичното исландско, хитот на Европскиот шампионат во јуни и јули оваа година.