Лихтенштајн е зицер што не смее да се испушти. Фудбалската репрезентација на Македонија вечерва (20,45 ч.) во Вадуц го игра петтиот натпревар во квалификациите за СП 2018 во Русија. По четирите порази досега, на ред е дуел со аутсајдерот во групата Г против кој е илузорно да се потенцира дека треба или мора да се победи.
„Поквалитетни сме, но мора да дадеме максимум, да одиграме како што ќе се договориме, да го испорачаме она што ќе се побара од нас. Ако бидеме на нивото од претходните четири средби, тогаш нема да имаме проблеми. Ова е натпревар во кој нема фаворит бидејќи и тие и ние сме без бодови досега во овој циклус“, истакна капитенот Горан Пандев.
Однапред добиени натпревари се најтешки за добивање во фудбалот. Многупати досега сме биле сведоци на резултати што биле спротивни на очекуваните и преку туѓи искуства, но и преку сопствени на клупски и репрезентативен план. Таквите прилики носат одреден притисок меѓутоа не треба да донесе контраефект со противници каков што е вечерашниот.
„Во фудбалот нема лесни противници. Го кажав тоа при собирот на подготовките во Скопје, го повторувам тоа и сега во Вадуц. Ако сакаме да победиме ќе мора ние да бидеме на максимално ниво, на нивото на кое бевме на минатите средби. Разликата овојпат треба да биде победа, исход во кој сите веруваме и очекуваме“, вели Игор Ангеловски, селектор на Македонија.
Поволна вест за него е дозволата за настап што ја даде делегатот на натпреварот за Стефан Спировски. Вардарецот беше под „неизвесни“ поради имобилизаторот на десната рака што мора да го носи за заштита на фрактурата на базата на палецот на десната рака. Но, сега е извесно дека играчот од средниот ред ќе биде опција за вечерашниот дуел против Лихтенштајн.
Вечерва (20,45 часот) се играат уште две средби од групата Г покрај, вкупно, деветте во квалификациите. Шпанија во Хихон го дочекува Израел, а Италија на Сицилија е домаќин на Албанија.
Квалификации за СП 2018
Денеска играат
Група Д
Грузија – Србија (Тбилиси/18 ч.)
Република Ирска – Велс (Даблин/20,45 ч.)
Австрија – Молдавија (Виена/20,45 ч.)
Група Г
Лихтенштајн – Македонија (Вадуц/20,45 ч.)
Шпанија – Израел (Хихон/20,45 ч.)
Италија – Албанија (Палермо/20,45 ч.)
Група И
Турција – Финска (Анталија/18 ч.)
Косово – Исланд (Скадар/20,45 ч.)
Хрватска – Украина (Загреб/20,45 ч.)