Македонија денеска е зафатена од студен бран од портокалова фаза. Tемпературите измерени утрово се од -18 до -9 степени, а дневните, според прогнозата од УХМР ќе бидат од -4 до 2 степена.
Најстудено во Македонија изутринава е во Берово, каде што се измерени – 18 степени, во Скопје-Петровец и Крива Паланка -15, а во Куманово, Маврово и Крушево -14 степени. Во Ѓуриште се измерени -13, во Лазарополе и Пожаране -12 а во Скопје-Зајчев Рид, Тетово, Виница -11 степени. Во Гевгелија се измерени -5 степени, минус седум во Битола, минус осум во Прилеп, Дебар, Претор, Охрид, Струмица, Демир Капија, и -10 во Штип.
Во Скопје, студеното време со повремени сончеви периоди ќе биде дополнето и со слаб до умерен југоисточен ветер. Измеренетаа температура утрово покажа минус 15 степени, а дневната ќе се искачи само до -2 степена.
Најмногу снег, пак, има во Маврово, каде висината на снежната покривка изнесува 87 сантиметри, во Лазарополе 79, во Крушево 58 и во Пожаране се измерени 50 сантиметри.
Од УХМР информираат дека во текот на ноќта, почнувајќи од запад, ќе има врнежи од снег, кои до петок претпладне на некои пониски места ќе поминат во дожд, а локално ќе има и појава на замрзнат дожд. Ќе дува слаб до умерен југоисточен ветер.
За време на викендот се уште ќе има слаб локален дожд, но ќе температурите значително ќе се покачат.
Поради студениот бран, Комисијата за превенција од штетни ефекти од студени бранови при Министерството за здравство препорача да се ослободат од работа бремените жени и лицата над 60 години. За оние работници кои работат на отворено се препорачува реогранизација на работното време од 10 до 16 часот, со повремени паузи по половина час во топли простории на секои два часа.
Комисијата апелира да се избегнува физичка активност на отворено, а при движење да се внимава на лизгави површини и да се носи топла повеќеслојна облека, соодветни обувки за снег и мраз, како и почесто да се консумираат топли напитоци. Хронично болните лица редовно да ја земаат препишаната терапија. Во случај на настинка и потешкотии на дишењето, се препорачува граѓаните веднаш да се јават кај својот матичен лекар