Денарот одбележува 28 години од воведувањето како платежно средство во Македонија по осамостојувањето од поранешна Југославија. На денешен ден (26 април) пред 28 години се донесени повеќе закони како предуслов за осмислување и примена на самостојна монетарна политика од страна на Народната банка. Надлежните уверуваат на негова стабилност и одржување стабилен курс.
„Девизниот курс на денарот е стабилен и нема промени во неговото ниво. Народната банка располага со низа инструменти со кои гарантира дека девизниот курс на денарот во однос на еврото ќе остане стабилен. Стабилноста на курсот била и ќе остане наш приоритет. Ние гарантираме дека денарот ќе остане стабилен“, посочуваат во неколку наврати од Централната банка по почетокот на корона-кризата.
Оттаму потсетуваат дека девизните резерви што се клучни за одржување на стабилноста на курсот на домашната валута се на високо ниво, и тоа двојно повисоко од пред глобалната економска криза во 2008 година. Гувернерката Анита Ангеловска-Бежоска во неколку наврати уверуваше дека граѓаните треба да бидат спокојни и дека не треба да постои никаква загриженост за домашната валута.
Денарот како национална валута во земјава е воведен на 26 април во 1992 година, на денот на нејзиното монетарно осамостојување. На почетокот, во првата година, се користеше како вредносни бонови, а во 1993 година се појави и првото оригинално издание на денарот.
Книжните пари што се употребуваат и денес се пуштени во оптек на 8 септември во 1996 година. Во оптек се пуштени книжни пари во апоени од 10, 50, 100, 500, 1000 и 5000 денари, но последната е повлечена поради нејзиното мало користење.
Изгледот на македонските книжни пари го отсликува богатото културно наследство на Република Северна Македонија и осмислен е од ликовната уметница Билјана Унковска, а финалниот дизајн е изработен во печатницата „Де ла Ру“, Велика Британија.
Во 2018 година, се пушаат во оптек и првите полимерни пари во земјава со вредност од 10 и 50 денари.
Како платежно средства се користат и кованите пари од еден, два, пет, 10 и 50 денари. До 2013 година се користеше и монета од 50 дени која беше најниска домашна валута. Во моменто најниска домашна валута е еден денар.
Македонската национална валута го добила според истоимената античка римска валута – денар (лат. denarius) што се употребувала и на нашата територија во минатото.
Книжни и ковани пари според законската регулатива, издава Народната банка, која е одговорна за снабдување со книжни и ковани пари.