Министерството за надворешни работи, денеска информираше дека засега во Амбасадата на Македонија во Вашингтон не се обратиле за помош македонски граѓани засегнати од ураганот Ирма кој ги зафати Карибите и брегот на САД.
„Воедно, во комуникација сме и со Канцеларијата на странски мисии во Вашингтон и до денес немаме добиено информација за пријавени македонски државјани од погодените подрачја. Од социјалните мрежи дознавме дека има еден македонски државјанин на островот Ст. Мартин. Иако островот територијално припаѓа под јурисдикција на Франција и Кралството Холандија, поради географската близина сепак пробавме да стапиме во контакт уште во текот на вчерашниот ден (преку социјалните мрежи) но се уште немаме добиено одговор“, пишува во соопштението на МНР.
Телефонските броеви за контакт со македонската амбасада во Вашингтон на кои може да се обратат македонските граѓани во секое време се: 202-390-7418 и 202-667-0501.
Ураганот Ирма, кој го достигна петтиот степен на скалата Сафир Симпсон се упати синоќа кон северното крајбрежје на Куба на патот кон Флорида, оставајќи зад себе пустош на повеќе карипски острови и 21 жртва, а се очекува зголемување на бројот на загинатите со доаѓањето на екипите за спасување во најпогодените подрачја.
Шефот на американската Федерална агенција за управување со вонредни ситуации (ФЕМА) Брок Лонг изјави вчера дека американските власти подготвуваат опсежни мерки за реакција на ураганот Ирма, кој се очекува да ја погоди Флорида.
Тој предупреди дека некои делови од Флорида би можеле со денови да останат без електрична енергија, а можеби и подолго, како и дека на над 100.000 луѓе најверојатно ќе им треба засолниште.