Заменик министерот за животна средина и просторно планирање, Јани Макрадули, денеска изврши увид на мерната станица во Центар и истакна дека напорите на Владата на Република Македонија, но и на сите други институции за намалување на аерозагадувањето веќе даваат резултати. Тој притоа сподели неколку статистики од мерните станици кои покажуваат делумен напредок и резултати од досегашните напори.
„Направивме споредба на податоците од изминатите три години (2016 година, 2017 година и 2018 година) за периодите 1 јануари–30 ноември и забележавме дека во 2018 година постои намалување на бројот на загадени денови. Станува збор за број на денови со надмината дозволена загаденост од 50 микрограми, изјави Макрадули.
Сериозно намалување на бројот на загадени денови, вели тој, има во Тетово, каде во 2016 година имало 273 загадени денови, во 2017 година – 115 денови, додека во 2018 тој број паднал на 105 денови.
„Во Битола лани имало 105 загадени денови споредбено со 65 денови годинава на првата мерна станица или 99 загадени денови лани наспроти 70 годинава на локацијата на втората мерна станица. Просекот од сите мерни станици на национално ниво покажува благ пад. Од 99 загадени денови во 2016 година и 2017 година на 86 загадени денови во 2018 година во периодот 1 јануари-30 ноември“, истакна заменик министерот за животна средина и просторно планирање.
Макрадули нагласи дека од анализата ги исклучиле мерните станици кои не се во функција.
„Анализата покажува тенденција на намалување на највисоките измерени ПМ10 вредности на годишно ниво, односно, пад на највисоката регистрирана загаденост на воздухот. Просекот од највисоките ПМ 10 вредности од сите мерни станици паднал од 336 во 2017 година на 189 во 2018 година. Во Карпош постои двојно намалување на ПМ 10 честичките и тоа од 525 како максимална вредност во 2017 година на 245 во 2018 година. Во Миладиновци од 423 на 188, во Битола 2 од 530 на 184, во Куманово од 450 на 205 и во Центар од 482 на 224, изјави Макрадули.
Тој апелира секој да придонесе за намалување на загаденоста бидејќи заедно може да го спроведеме Планот за чист воздух и да се спротивставиме на загадувањето и на загадуавачите. Ова е стратешко прашање на Република Македонија бидејќи сите дишеме ист воздух, нагласи Макрадули