Вчера на Комисија од страна на претставниците на Владата се потврди дека законот за магистрален гасовод нема врска со проектот Јужен тек, истакна во својот говор пратеникот на СДСМ, Јани Макрадули.
Според него, се потврди од страна на претставниците на Владата дека компанијата Македонски енергетски ресурси немаат никаква лиценца за работа со гас. И дека од кога овој закон ќе помине, на фирма од 7 луѓе без никакво искуство во овој сектор, ќе им се даде бизнис вреден, да менаџираат од околу 200 милиони евра најмалку.
„Во законот пишува, а тоа е превземено и од меѓу владиниот договор, 15 милиони евра се обврска на Република Македонија. Како и од која ставка ќе бидат исплатени тие средства? Бидејќи во Буџетот на Република Македонија, во доменот на гасификација, Министерството за транспорт и врски има само 3.8 милиони евра“.
– Владата призна дека лиценцата ќе ја издаде од кога ќе се донесе овој закон.
– Владата потврди дека со овој закон ќе се приклучи на постоечкиот систем на Гама. Тоа значи дека 7 години кога ве молевме да го направите тоа, вие одбивавте, нанесувајќи огромна штета на Република Македонија и нејзините граѓани. Значи можело, ама била политичката одлука и бизнис интересите на Ставрески, Пешевски, Груевски, компанија и ДУИ за да не започне овој процес.
– Иако овластувањето што е дадено од страна на Владата на 15 октомври 2013 година, зборува дека овие 75 милиони долари се наменети за гасовод од Клечовце до Кавадарци и 5 километри до Неготино. Владата денес пред нас дава закон каде што тие пари ќе се потрошат само до околината на Штип. Што после околината на Штип? И колку граѓаните на Република Македонија ќе треба да платат, бидејќи законот предвидува на руската компанија да и се исплаќаат и сите дополнителни оперативни трошоци до пуштањето на гасоводот. Тоа оперативни трошоци значи руската компанија ќе ангажира консултант. Тој консултант ќе чини милион евра. Тоа ќе го платат граѓаните на Република Македонија, рече Макрадули.