Францускиот претседател Емануел Макрон денеска изјави дека царинските тарифи што ги објави американскиот претседател Доналд Трамп се „брутални и неосновани“ и претставуваат шок за меѓународната трговија.
Макрон рече дека Европа мора да одговори на овие мерки поединечно во секој индустриски сектор, пренесува Ројтерс.
Говорејќи за време на состанокот со претставници на француската индустрија, Макрон додаде дека одговорот на реципрочните царини ќе биде „помасовен“ од одмаздничките мерки на американските царини за челик и алуминиум.
Емануел Макрон денеска ги повика француските компании кои работат во Соединетите Американски Држави да ги прекинат сите свои инвестициски проекти во таа земја додека не се разјасни најавата на Доналд Трамп за масовно зголемување на царините за увозот од Европската унија.
Она што е важно е дека идните или најавените инвестициски проекти во последните неколку недели се привремено суспендирани додека не ги разјасниме работите со Соединетите Американски Држави, рече францускиот претседател за време на средбата со претставниците на француските индустриски сектори кои се најпогодени од најавените американски царини, пренесува БФМ ТВ.
Макрон се прашуваше каква ќе биде пораката доколку главните европски бизнис играчи почнат да инвестираат милијарди евра во американската економија во време кога француската економија е нападната.