Мал драмски театар-Битола на сцената на театарот во Враца, Бугарија ќе ја изведе претставата „Грав“ од Елин Рахнев во режија на Љупчо Ѓоргиевски.
Премиерната изведба е закажана за 16. февруари, а влезниците за овој културен настан во Враца веќе се распродадени, вели продуцентот Александар Лозановски.
– Овој проект е копродукција со Драмско – Куклениот Театар од Враца, а во него учествуваат нашата Јоана Поповска заедно со актерите Анастас Попдимитров и Георги Грозев од Бугарија. Музиката е на Марјан Нечак а сценографијата и костимите на Марија Диманова. Следната премиера како копродукција со истиот театар од Бугарија ќе биде промвирана кон крајот на следниот месец. Станува збор за претставата „Човекот е човек” од Бертолд Брехт во режија на Мартин Кочовски, посочи Лозановски.
Мал драмски театар-Битола паралелно ја подготвува и претставата „Крал Рес” од Еврипид во режија на Павлос Данелатос која е во копродукциска соработка со театарот „Андреас Воутсинас“ од Солун која премиерно ќе се прикаже во Битола на 16-ти април.
– Во Националната програма на Министерството за култура поддржани сме со еден проект. Тоа е претсватава „Коекција” од Зоран Гаши во режија на Ник Апер која премиерно ќе биде изведена кон крајот на месец јуни. Овој проект е копродукција со фестивалот „Ех Понто” -Љубљана и Културен Центар – Нови Сад, истакна Лозановски.
Во текот на оваа сезона Мал Драмски Театар – Битола е поканет и ќе учествува на фестивали во Европа, а предвидени се настапи и во Русија и Канада.