Мал драмски театар од Битола протестира и денешниот празник реши да го помине работно.
„И покрај неколкуте денови исполнети со успеси, денес, на 1. мај во малиот канцелариски простор на „Мал драмски театар – Битола“ ја реализираме првата проба за проектот „Корекција“ од Зоран Гаши во режија на Ник Апре (Нико Горшиќ), кој што е копродукција со фестивалот „Експонто“ од Љубљана.
Креативната и актерската екипа предводена од продукцискиот тим Стефановски и Лозановски одлучи работно да го помине овој ден во знак на протест за лошиот третман кој го добиваме од институциите и покрај статистичките показатели кои не’ прават најуспешен театар во Македонија“, велат од Театарот
Мал Драмски Театар – Битола на 29 април на сцената на театарот “Андреас Воутсинас“ во Солун ја одигра претставата „Столови“ од Јонеско во режија на Љупчо Ѓоргиевски.
„Познатата театарска криричарка, режисерка и професорка, Васо Папахаралампус воодушевена од играта на доајенот Јоана Поповска и великанот Анастас Попдимитров предложи да работиме заедничка претстава а режисерот Павлос Данелатос не покани да ја одиграме „Столови“ уште неколку пати во Солун. Овој настап со претставата „Столови“ е од огромно значење бидејќи по повеќе од 10 години, во Солун, се игра македонска претстава“, вели Благој Стефановски, првиот човек на Театарот
Деновиве во Солун се реализирале и неколку проби за претставата „Крал Рес“ копродукција со театарот „Андреас Воутсинас“ во кој учествуваат 24 актери (по 12 од двете страни) комбинација од доајени, млади актери, студенти и аматери. Оваа претстава, заедно со неколку семинари и изложби, е дел од проектот „Интеракт“ финансиран од програмата на ЕУ за Прекугранична соработка.
На 26. април на Интернационалниот фестивал на монодрама во Валона, Мал Драмски Театар – Битола учествуваше со монодрамата на Здравко Стојмиров, „Дневникот на лудиот“ од Гогољ во режија на Роберт Симоновски.