Натчовечките напори на жителите, пожарникарите и сите инволвирани во гаснењето ја спасија од опожарување манастир „Св.Петка“ од пожарот кој повеќе од 10 часа беснее во Пехчево. Моментално ситуацијата е под контрола, а гаснењето продолжува со четири возила кои пристигнаа на напомош од Бугарија. За време на пожарот, како што информираат жителите кои цел ден учествуваа во гасењето, комбајните жнееле со цел да се спаси житото од пламените јазици.
– За среќа манастирот е спасен, изгасен е на време. Не е доцна за помошта што стигна од Бугарија, бидејќи има потреба од помош кај Чифлик, Умлена и Робово оти од таму може да се префрли многу лесно за Пехчево. Попладне дојде и хеликоптер на Армијата. Гаснеа и пожарникарите, од Шумско стопанство и населението. Се што дојде за помош е добредојдено, вели жител на Пехчево.
Додава дека според негова проценка штетата е катастрофална.
– Штетата е огромна, пределот не е најбогат но доста добар е, има доста борова шума, се е изгорено. Тоа на пладне беа страшни пламени јазици, вели тој.
Паралелно продолжува гаснењето на пожарот кај маалото Пасјак каде едно од вкупно четирите возила кои пристигнаа како помош се вклучија во гаснење на огнената стихија над селото Нов Истевник.